Güello

De Biquipedia

Güello umano

O güello ye un organo sensible á la perzeuzión de a luz, que en os umanos s'identifica con o sentito de a bista. Os güellos más simples no fan que deteutar si arredol d'éls ye claro u escuro. Os güellos más complexos son acostumbratos á ofrexer una perzeuzión bisual. Muitos organismos complexos, como los mamiferos, os paxaros, os reutils u os pexes, tienen dos güellos que pueden enfocar-sen bien enta un mesmo plano, resultando-ne una unica "imachen" tridimensional (bisión binocular) como en o caso de os umanos, bien enta planos diferens, creyando asinas dos "imáchens" deseparatas (bisión monocular), como en o caso de os coniellos e os camalions.

En a mayoría de bertebratos e en bels moluscos, a funzión de o güello ye de proyeutar imáchens sobre una retina sensible á la luz, en a cual se deteuta la luz e os siñals son trasmetitos ta o zelebro per meyo de o nierbo optico. Istos güellos, per un regular, son alto u baxo esfericos, contienen una sustanzia trasparén xelatinosa clamata umor bitria, con una lente d'enfoque clamata cristalino e á ormino un musclo, l'iris, que regula la intensidá de luz que penetra en o güello. Os güellos de os zefalopodos, os pexes, os anfibios e as serpiens acostumbran á tener cristalinos fixos e o enfoque se consigue de trazas parexitas á las de a lente d'una camara.

[Editar] A eboluzión de os güellos

Ye una custión difízil, dende o punto de bista de a teyoría de a eboluzión, determinar cómo puede aber-se desarrollato una estrutura tan complicata como a de o güello. Anque a suya prezisión e complexidá son grans, os modelos d'eboluzión ocular per ordinador que reyalizoron Dan-Erik Nilsson e Susanne Pelger contrimostroron que un organo sensitibo optico primitibo podeba eboluzionar ta un complexo güello umanoide en un periodo de tiempo razonable, menor á un millón d'años, sólo que per meyo de chiquetas mutazions e a selezión natural.

Os güellos s'adautan á las nesezidaz de cada animal. Per exemplo, as rapiñeras tienen una agudeza bisual muito más gran que a de os umanos e belunas, como as diurnas, pueden beyer a luz ultrabioleta. Á ormino s'ha parlato de as diferens formas de güello en, per exemplo, os bertebratos e os moluscos como siñal d'una eboluzión paralela, socherindo que o desarrollo de os güellos per eboluzión no ye tan improbable como parex. Manimenos, a eboluzión de o güello se considera monofiletica, o que sinifica que toz os güellos autuals, per bariatos que sigan, tienen os suyos oríchens en un protogüello que aparenmén s'abría desarrollato fa uns 540 millons d'años.

[Editar] Anatomía de o güello

Iris umano (engrandamiento)

En os mamiferos, a estrutura de o güello ye espezialmén diseñata ta o quefer d'enfocar a luz sobre a retina. Toz os componens per os que pasa la luz dintro de o güello antis de plegar en a retina son trasparens, minimizando lo escureximiento de a luz. A cornia e o cristalino aduyan á que as rayadas de luz comberchan en a retina. Ista luz causa uns cambios quimicos en as zelulas fotosensibles de a retina, prebocando asina que uns empulsos nierbosos endrezen enta o zelebro.

A luz dentra en o güello dende un meyo esterno como l'aire u l'augua e pasa á trabiés de a cornia dica la primera de as dos umors, l'umor acuosa. Gran parti de a refrazión de a luz ocurre en a cornia, que tiene una curbatura fixa. A primer umor ye una masa clara que coneuta la cornia con o cristalino, aduya á mantener a forma combecsa de a cornia (nesezaria ta la comberchenzia de a luz en a lente) e soministra nodriens á lo endotelio de a cornia. L'iris, entre o cristalino e a primer umor, ye un zerclo coloriato de fibras musculars. A luz ha de pasar en primeras per o zentro de l'iris, a pupila u nineta de o güello. Os musclos zercular e radial s'encargan autibamén d'achustar a grandura de a pupila ta mantener un nibel más u menos contino de luz que penetra en o güello. Si bi n'entrase demás, a retina podría resultar dañata; e si bi n'entrase bien poqueta, podría enzegar. O cristalino, dezaga l'iris, ye un disco elastico combecso que enfoca la luz, á trabiés de a segunda umor, sobre a retina.

Á l'altro canto de o cristalino se troba la segunda umor, l'umor bitria, que dixa entrar a luz sin refrazión, aduya á mantener a forma de o güello e sospende o delicato cristalino.

Tres napas de texito rodían l'umor bitria. A más esterna ye a esclerotica, que da ixa color blanca á la mayor parti de o güello. Ye feita de texito conchuntibo de fibrina e s'encarga de protexer os componens internos de o güello e de mantener a suya forma. En a parti interna de a esclerotica se troba la coroides, que contién os basos sanguinios que soministran l'osicheno nesezario á las zelulas de a retina e eliminan o rebús de a respirazión zelular. Ye a que da una color escura á la parti interna de o güello, pribando asinas cualsiquier reflexo perchudizial en o interior de o güello. A napa más interna ye a retina, que contién as fotorrezeutoras zelulas gayatas e zelulas conicas, e neuronas.

Ta masimizar a bisión e l'asorzión de luz, a retina ye una napa relatibamén lisa, anque curbata. Con tot, bi ha dos puntos en que ye diferén: a fueba u fobia e o punto ziego. A fobia ye a responsable de a bisión en color de os umanos e de l'alta agudeza bisual nesezaria, per exemplo, á l'ora de leyer. O punto ziego ye an que o nierbo optico penetra la retina ta coneutar con as zelulas nierbosas de o suyo interior. En no esistir zelulas fotosensibles en iste punto, li'n dizen punto "ziego". En bels animals, a retina contién una napa refletora que acrexenta la cantidá de luz que perzibe cada zelula fotosensible, premitindo á l'animal de beyer millor en condizions de baxa luminosidá.

En resumen, as prenzipals partis de o güello son:

Canal de Schlemm
Conchuntiba
Cornia
Coroides
Cristalino
Disco optico
Esclerotica
Fobia
Iris
Macula
Musclo ziliar
Nierbo optico
Punto ziego
Pupila u Nineta
Retina
Tapetum lucidum (no se troba en os umanos)
Umor acuosa
Umor bitria

[Editar] Cambios oculars per a edá

Con o paso de os años, o güello adouta bels cambios que sólo que pueden acumular-sen á o prozeso d'abiellamiento. Muitos d'istos prozesos anatomicos e fisiolochicos siguen un declibe gradual. Con a edá, a calidá de a bisión s'apiora per razons que no siempre son relazionatas con malotías oculars. Anque son muitos os cambios que se produzen, os más sinificatibos son a reduzión de a grandaria de a nineta e o pierde de capazidá ta enfocar, a presbiopía. L'aria de a nineta dezide a cantidá de luz que puede plegar en a retina. Tamién decrex a capazidá de dilatazión de a pupila. O feito d'aber una nineta más chica fa que os güellos biellos reziban más luz en a retina, como si portasen mirallos de sol de densidá meya á clara luz de o día e mirallos bien escuros á las foscas. Per ixo, as personas grans han amenister de más luz ta reyalizar quefers que requieran una buena iluminazión.

Con a edá, se desarrolla una mena de zerclo blanco en a periferia de a cornia, clamato arcus senilis. L'abiellamiento fa que os texitos de os parpagos se tornen más tobos e decaigan. Istos e belaltros cambios contrebuyen á la etiolochía de desórdens en l'aria de os parpagos. O xel bitrio sofre una licuefazión (o desprendimiento bitrio posterior), fendo que crexca o numero d'opazidaz bisibles, as clamatas "moscas boladeras".