Gaspar Sanz
De Biquipedia
|
Gaspar Sanz (Calanda, Tergüel, 4 d'abril de 1640 - (probablemén) Madrid, 1710), mosén, considerato lo teorico español d'a guitarra més importán d'o sieglo XVII. Bels espezialistas esfensan que tamién estió lo más completo de toz os d'o suyo tiempos. O mesmo Sanz en a suya obra esplica que estudió con os millors mayestros de capiella d'España. Más tardi biachó ta Italia an continó os suyos estudios d'orgán en a Capiella Reyal de Nápols y dimpués en Roma, an tamién perfeuzionó os suyos estudios de guitarra con Lelio Colista.
Dimpués tornó ta España, con una gran influyenzia d'a suya estada en Italia, y pasó a estar instrutor de guitarra de Chuan II d'Austria, á qui adedicó lo libro "Instruzión de mosica sobre a guitarra española".
[Editar] Obra
A suya obra destaca por a calidá d'a suya mosica y por o gran numero d'edizions, que no nomás influyió en o panorama español d'a guitarra barroca sino que s'estendilló por tot o sieglo XVIII, an trataus y edizions li prenen como modelo.
O libro yera un tratau teorico completo ta tocar a guitarra con tot tipo de consellos teunicos y mosicals, acompañato d'asabelas composizions d'o mesmo Sanz, as cualas, contando os tres bolumens que forman o libro, son 90.
D'a obra de Sanz se'n fazioron en o sieglo XVIII güeito edizions: a primera en 1675 y a güeitena en 1697, anque os tres bolumens que forman a obra completa son de 1675. Posiblemén más adebán se fazioron más edizions, ya que Sanz gosaba fer-ne barias una misma añada, porque a obra se fazió de camín mui popular. Pero por o prelogo d'a terzera edizión de 1675, sabemos que a obra que se conserba ye completa porque parla que a obra serba formata de tres libros. Tanto lo libro segundo como sobretot o terzero contienen composizions de mayor dificultá y polideza que o primero.
Mientres o sieglo XIX a mosica de Gaspar Sanz pasa á conbertir-se en una istoria bibliografica; grazias á las suyas numerosas edizions, se remera o suyo nombre y a suya pasada gloria.
En l'autualidá, Gaspar Sanz forma parti d'o repertorio estandard d'a mayoria de conzertistas, anque a suya obra ye reduzita á un chicot numero d'as suyas piezas.
