Sheryn Regis
Gikan sa Wikipedia, ang gawasnong ensayklopedya
Si Sheryn Mae Poncardas Regis usa ka iladong mag-aawit nga Sugboanon. Siya gipanganak sa Carcar, Sugbo nila ni Bernardo ug Daisy Regis. Siya ang kinamaguwangan sa tulo ka managsoon uban nila ni Elton ug Joseph.
Si Sheryn mas nahinumdoman isip labing paboritong kontestant sa Star in a Million diin siya miapil. Nakuha niya ang ikaduhang ganti human siya pildeha ni Erik Santos niadtong Enero 2004. Gikan sa pagka "Power Belter" ngadto sa pagka "Shining Diva", si Sheryn mas ilado na karon isip The Modern Jukebox Queen. Sukad pa kaniadto, nakuha na ni Sheryn ang suporta ug gugma sa mga tawo ug mas ilado siya sa talagsaong pagkatugtog sa mga kanta sama sa Come In Out of the Rain ni Wendy Moten, Maybe ni Roberta Flack ug Peabo Bryson, ug sa iyang popular nga pagkanta sa Through the Fire ni Chaka Khan.
Mga sulod |
[usba] Kabatan-onan ug karera
Dili sayon ang kabatan-onan ni Sheryn. Samtang nagdako, natagamtaman sa iyang pamilya ang tinud-anay nga dagan sa kinabuhi. Tungod sa kakulangon sa kuwarta, gikinahanglan ang paglangyaw sa iyang amahan ngadto sa Saudi Arabia. Niadtong mga panahona gigiyahan si Sheryn sa iyang inahan nga si Daisy sa iyang pagkanta. Sa tinud-anay, ang amahan ni Sheryn ang maayong mokanta apan ang iyang inahan ang mipuli isip magtutudlo ni Sheryn sa pagkanta.
Sa batang pangedaron nga dos anyos, kahibalo na si Sheryn mokanta og yano nga mga tono, matod pa sa iyang inahan. Ang una ug paboritong kantahon ni Sheryn sa mga indigay sa pag-awit mao ang Dito Ba ni Kuh Ledesma, nga nakat-onan ni Sheryn niadtong lima ka tuig pa lamang siya. Sa pangedaron nga siyete, nagsugod og apil-apil si Sheryn sa mga bangga sa pagkanta. Ang iyang daog sa pag-apil niya sa mga kontes sa pagkanta iyang gigamit sa pagpalit og album ni Shirley Bassey alang sa iyang sunod nga pagpakigtigi sa pagkanta. Sa pangedaron nga otso anyos unang nakadaog si Sheryn sa labing dakong premyo. Ang iyang gikanta sa maong higayon mao ang Saan Ako Nagkamali? ni Ms. Tillie Moreno.
Samtang ang ubang bata naggahin og oras sa pagdula-dula, si Sheryn walay kapuol sa pagbansay-bansay og awit alang sa sunod nga mga indigay. Bisan walay pormal nga pagtuon, nahinumdoman niya nga kaniadto nagkanta-kanta siya duol sa halawom nga atabay para maabot niya ang hataas na mga nota.
Nasulayan usab ni Sheryn ang pagtudlo og awit sa mga bata sa dihang diha siya sa hayskol. Pagtungtong niya sa kolehiyo, nahuman ni Sheryn ang kursong batsilyer sa sekundaryang edukasyon, mayor sa Iningles, sa Tunghaang Normal sa Sugbo (karon Unibersidad Normal sa Sugbo. Niining mga higayona miapil sab siya sa pagpadayag sa arte sa teyatro. Tungod niini, nahatagan siya og higayon sa pagbiyahe sa lainlaing nasod, lakip na ang Kanada ug Amerika. Kaniadtong tuig 1999, midaog si Sheryn isip Labing Maayong Maghuhubad sa Cebu Pop Music Festival (usa ka indigay sa pagmugna ug paghubad og mga awit) ug ang orihinal nga gikanta niya midaog usab sa labing dako nga premyo.
Nagtrabaho si Sheryn isip usa ka mang-aawit sa Cebu Plaza Hotel diin niya makita ang tinuoray nga gugma sa iyang kinabuhi, si Earl Echiverri, nga usa ka piyanista kaniadto. Bisan sa hadako nga gintang sa ilang mga pangedaron, wala kini mahimong babag sa ilang pagminahalay. Niadtong 2002 gikasal sila ug gitugahan og usa ka anak na gianggaan nila og "Sweetie".
Sa tuig 2003, gisulayan ni Sheryn ang iyang suwerte sa Star in a Million sa ABS-CBN. Siya ang kanunayng labaw sa iyang mga kakompetensiya ug nahimong pinasidunggan sa mga mipili pinaagi sa teks, apan miuli siyang ikaduha lamang. May mitanyag kaniya og kontrata apan tungod sa iyang utang kabubut-on sa ABS-CBN, ang kontratang gikan sa maong estasyon ang iyang gipirmahan.
[usba] Mga bag-ong kalamboan
Takos ra usab nga tawgong kampeyon si Regis human sa Star in a Million. Daghang mga kahigayonan ang miabot kaniya human sa maong bangga. Ang awit nga Come In Out of the Rain (ang iyang giawit sa kampeyonato sa Star in a Million) nahimong popular sa radyo. Kini nakaabot sa unang puwesto sa MYX Hit Chart ug milungtad og 12 ka semana niini.
Niadtong Abril 2004, gipagawas sa Star Records ang labing unang album niya, nga giulohag Come In Out of the Rain. Sulod lamang sa tulo ka bulan, nahimo na kining platinum. Lakip sa mga awit sa maong album ang "Kailan Kaya" (sinulat ni Cacai Velasquez ug Raul Mitra) nga gigamit sa pantaseryeng Marina.
Nalakip usab si Regis sa mga variety shows, sama sa Magandang Tanghali Bayan, Most Requested Show, ug ASAP ’06. Gipili si Sheryn ni Vehnee Saturno isip usa ka representante sa Pilipinas alang sa 2004 Voice of Asia Song Festival nga gipahigayon sa nasod sa Kazakhstan ug diin napunggit niya ang ikaduhang premyo.
Kauban niya sila si Sarah Geronimo, Erik Santos, Rachelle Ann Go, Frenchie Dy, Jerome Sala, Kris Lawrence, Jed Madela, Mark Bautista ug si Christian Bautista sa grupo sa mga "Champions", mga mag-aawit nga Pilipino nga misikat tungod sa pag-apil og mga bangga sa pag-awit.
Kaniadtong Hulyo 2005, gipagawas ni Sheryn ang ikaduhang album nga giulohag What I Do Best. Ang kantang "What I Do Best" sa maong album gigantihan isip Best Song by a Female Performer sa iFM Pinoy Music Awards sa nahisgotang tuig. Siya ang miawit sa "Sabihin Mo Sa Akin" nga gigamit sa pantaseryeng Kampanerang Kuba sa ABS-CBN (gidala ni Anne Curtis). Ang iyang kanta nga "Hindi Ko Kayang Iwan Ka" napili isip dugokang awit sa teleserye nila ni Kristine Hermosa ug TJ Trinidad sa Gulong ng Palad. Ang lain niyang kanta nga "Dahil Nagmamahal" napili usab nga theme song sa programang Nagmamahal, Kapamilya ni Bernadette Sembrano. Nahimong host si Sheryn sa nahumang Search for the Star in a Million Season 2, uban sa mga kampeyon nga sila si Erik Santos, Rachelle Ann Go ug Mark Bautista. Siya sab ang host sa Little Big Star Cebu, nga giisip ikaupat nga top-rating nga programa sa Nationwide Charts sa ABS-CBN.
Kaniadtong Nobyembre 2006, gipagawas ni Sheryn ang ikatulong album nga giulohag The Modern Jukebox Collection.
[usba] Mga album
| Atubangan sa album | Detalye | Titulo | Mga awit |
|---|---|---|---|
 |
May 2004
Star Records |
Come In Out of the Rain |
|
 |
July 2005
Star Records |
What I Do Best |
|
 |
November 2006
Star Records |
The Modern Jukebox Collection |
|
[usba] Mga single
[usba] Come In Out of the Rain
- 2004: Come In Out of the Rain
- 2004: Kailan Kaya (Marina OST)
- 2004: Maybe
- 2004: Follow Your Dream
- 2004: Sana'y Ingatan Mo
[usba] What I Do Best
- 2005: Sabihin Mo Sa Akin (Kampanerang Kuba OST)
- 2005: What I Do Best
- 2006: Hindi Ko Kayang Iwan Ka (Gulong ng Palad Love OST)
- 2006: Dahil Nagmamahal (Nagmamahal, Kapamilya OST)
- 2006: Sa Piling Mo
[usba] The Modern Jukebox Collection
- 2006: Ang Pag-ibig Kong Ito
- 2007: I Remember the Boy (Sana Maulit Muli Love OST)
- 2007: Maria Flordeluna (Maria Flordeluna OST)
[usba] Mga ganti
- Labing Maayong Maghuhubad ug Kampeyon, ika-17 nga Cebu Pop Music Festival (Enero 1999)
- University Songbird of the Year, Unibersidad Normal sa Sugbo (2000)
- Ikaduhang Ganti, Voice of Asia Song Festival, Kazakhstan (Agosto 2004)
- Top Entertainer International Achievement Awardee, 21st Year-Ender Excellence Awards (Pebrero 2005)
- Labing Maayong Babayeng Manlilingaw, People's Choice Awards (Oktubre 2005)
- Best Song by a Female Performer para sa "What I Do Best", iFM Pinoy Music Awards (Enero 2006)
- Song of the Year Award para sa "Hindi Ko Kayang Iwan Ka", S-Magazine's People's Choice Awards (Oktubre 2006)
