Pasquale Paoli

From Wikipedia

Pasquale Paoli (o Pasquali Paoli) hè natu u 6 aprile di 1725 in Merusaglia. Era u figliolu di Ghjacintu Paoli. Pasquale cunnosci u so primu esigliu à 15 anni in Napoli à causa di a disfatta di u so babbu contra à i Ghjenuvesi. Feci alti studii in Napoli : storia antica. Parla u corsu (a sò lingua materna), u latinu, u talianu, l'inglese è u francese. Entra in l'armata per amparà un mistieru militare. Mà volta in 1755, dopu l'assassiniu da i ghjenuvesi di Ghjuvan Petru Gaffori, capu generale di a nazione corsa, chjamatu da u so fratellu Clemente Paoli par esse elettu novu Capu Generale di a Nazione u 13 di lugliu 1755 in a Cunsulta di Sant'Antone di Casabianca.

Pasquale Paoli hà fattu di a Corsica una nazione mudella, bella demucraziata incù a so cunstituzione propria. Issa cunstituzione guvernerà a Corsica durante 14 anni :

- Paoli mette for di e cità di San Fiurenzu, Calvi è Aiacciu i ghjenuvesi in 1756. Quelli si ne vani in Bunifaziu. - U capu generale cumanda tutta l'armata è arripresenta a Nazione davanti a i nazioni stranieri. - Crea un tribunale contra i vindetti - U populu eleghje i delegati di e pieve (1 per 1000 abitanti) per riprisentà lu ind'una "cunsulta" chì si riunisce 1 o 2 volti l'annu. Quella cunsulta vota i leghji, fissa l'impositu, numineghja i funziunarii - A consulta eleghje u "cunsigliu di statu" chì sò magistrati di più di 35 anni, unu per pruvincia. Ssu cunsigliu hè scumpartutu in trè camere : ghjustizia, finanze, guerra. - In ogni pieve ci sò un cumissariu numinatu da u capu generale, un pudestà,un capitanu d'armi è i delegati di pieve. - Paoli incuragisce vigna è arburi, introduce a cultura di u pomu. Incuragisce dinù a produzzione di e minere di piombu, ramu, farru è fabriche d'arme è d'arnesi. - Crea a cità di l'Isula Rossa - crea a marina di guerra è e milize paisane per a difesa naziunale. - dà a muneta à i corsi : una zecca marcata di a testa di u Moru. - crea u serviziu d'educazione naziunale, una scola in ogni capilocu, è l'università in Corti u 3 di ghjennaghju 1765. - crea una stamperia naziunale incù u ghjurnale di l'isula.

I ghjenuvesi chì s'aspettanu à esse pocu à pocu lampati fora di Corsica vendenu in sicretu l'isula à a Francia. U 25 di maghju 1768 in Corti, u capu generale è i diputati di a Cunsulta dichjaranu a nazione corsa in guerra contra à a Francia. D'ogni paese di tutta l'isula i patriotti armati correnu per a difesa di a so terra. Ma contru à una armata francesa numerosa è putente l'armata corsa hè disfatta u 9 maghju 1769 in Ponte Novu. U capu naziunale s'imbarca per Livornu è dopu per Londra, induve starà in esiliu per 20 anni.

Dopu a rivoluzione francesa in 1790 Pasquale Paoli rientra in Parigi incù l'accunsentu di l'assemblea Custituante, è volta in Corsica, elettu Direttore di Corsica. Ma dopu a morte di u rè di Francia in 1793 Pasquale Paoli ùn approva micca l'eccessi di a Rivuluzione francese è u regimu di u Terrore. U 2 aprile 1793 a Cunvenzione, accusendu Paoli d'agisce contra a rivuluzione, li caccia u cummandu di l'isula è dichjara ch'ellu fussi arrestatu. Paoli ricusa l'ordine. In a cunsulta in Corti u 26 di maghju 1793, i diputati pruclamanu Pasquale Paoli "Babbu di a Patria". A rivolta diventa generale in l'isula. Un omu sustene i francesi contra Pasquale Paoli : si chjama Napuleone Bonaparte. A Francia dichjara Paoli tradittore di a patria. U 15 di ghjugnu 1794 a Corsica si stacca da a Francia è offre a suvranità di a Corsica à Ghjorghju III, u rè d'Inguilterra. Ma u populu ùn hè micca d'accordu ancu l'azzione di u guvernu britannicu. Pasquale Paoli, per evità una guerra civile in Corsica hè custrettu in 1795 à imbarcà si per Londra, suvitatu da l'inglesi u 14 d'uttobre 1796. Tandu l'armata francese rioccupa l'isula senza resistenza. A Corsica diventa un dipartimentu francese. Scuraghjitu, Pasquale Paoli si ne stà in Londra, induve more novi anni più tardi.

[edit] Referenze

• Edward Joy Morris, Picturesque, Historical, and Social: with a Sketch of the Early Life of Napoleon, Philadelphia, 1855
• Francesco Maria Giamarchi, Vita politica de Pasquale Paoli, 1858, Bastia
• Ghjiseppu Leoni, Corsica Storia nustrale, 1984: Edizioni Cirnu è Meditarraniu

[edit] Da vede dinù

• Ghjacintu Paoli

E persunalità storiche di Corsica

Bartulumeu Arena - Circinellu - Dumenicu Rivarola - Ghjacintu Paoli - Ghjacumu Petru Abbatucci - Ghjiseppu Maria Buonaparte - Lucianu Buonaparte - Matteu de Buttafuoco - Nabulione Buonaparte - Pasquale Paoli - Rinucciu di la Rocca Sambucucciu d’Alandu - Sampieru Corsu - Ugo Colonna - Vannina d'Ornanu - Vincentellu d'Istria - Zampaglinu di Bucugnà -