Feqır ve Hêşi ra
Wikipediya ra, ensiklopediya xosere
Caê jü feqıro de zar beno,
Qe thawaê de xo çinebeno.
Yê dêy jü cênıka xo,
Jü ki çêverde herêde xo beno.
Herê xo her roz semere keno,
Sono bırr de koliu bırneno,
Herê xo eve koliu barkeno
Beno suke de roseno.
Tenê perey ke kunê ra dest,
Çêyi rê jü somıne hêrneno.
Eve na tore hondaê ke
Mothazê mıxeneti nêbeno.
Rozu ra rozê reyna,
Niseno ro herê xo sono bırr teyna.
Waxto ke koliu bırneno,
Wertê bırri ra vengê hesneno.
Xo ero na vengi ceno sono
Sono ke; çı bivêno!
Eke ke hesê gıno qılasê muriye ro
Nat-bota xo leqneno, fataşiyo araqdero.
Eke, jü na talas bo thawa niyo,
Reyê ki Lüye ama, hes tenge de diyo.
Êê! no fırsat fırsatê Lüyo!
Vana: »Na halde mı hes qe nêdiyo!«
Soynena cı jür u nêbiyawunê merdu,
Vana: »O nêbi, par to ez nêverdu lewê kergu!«
Sona peyra xo loqnena hêşi,
Hes hers de biyo jê adırê gemeşi.
Dewızo feqır tede vejino xafılde,
Vêneno hêşi na halo xıravın de.
Niadano ke Lüya dekbaze,
Zurna xo kerda ve saze.
Beno torjên ro verdano dıme,
Lüye remena sona kuna geme.
Niadano ke her caê hêşi dezeno,
Yeno, hêşi qılasê muriye ra vezeno.
Hes vano: »Bê ez ve tora bıbime bıra, To ez xelesnu na qeda u bela ra.«
Mordmek vano: »Ez xorê dewızo de feqıru
Seveta tenê koliu yon wertê na bırru!
Koliu danu arê, bon suke de rosenu
Çê xorê pê letıki somıne hêrnenu!
Bê, to mırê thawa meke
Ezı ki torê thawa nêkonu!«
Hes vano: »Tı ke nêvana caê halê mınê nıkay
Ez ki nara têpia torê bonu perr u pay.
Torê bırr ra koliu kon arê, konu lode
Bere xorê suke de mırd bırose, bıde!«
Nawa ke ewro naza ama hêşi rê,
Feqır qesey mekero gunê kêşi rê.
Feqır soz dano ra hêşi; tey beno bıra,
Hes bıray rê herroz koliu keno top, keno deyra.
Feqıri ravêr ke roz jü bari rê vatêne ›ya‹,
Nıka roz hirê baru rê oncia ki nêvano ›hêya!‹.
Eve na usıl u na qeyde
Çêverê Feqıri de mal u mılk beno jêde.
Rozê cênıka Feqıri rê beno ve xuye
Vana: »Marê kotira yena na dewletiye?«
Vana: »To nêşikiyêne biyarê barê de here,
Haê nıka koli kerdê çar barê qatıre!
Bê rose mıra vaze na hêkmete,
Torê kotira yena na huzm u quwete!«
Feqır ke cênıke de nêvêneno çare,
Niseno ro qeseykeno cırê pare ve pare.
Cênıke desınde resnena cirane,
Cirana xo na qese kena gırane.
Vengê hêşi kuno çar kosê dina
Hes hêşino pê xeyle waxt ra dıma.
Feqır reyna goligu ceno sono bırr,
Niadano ke hêşi koli arê nêdê, nêkerdê pırr.
Nêzoneno ke çıko hal u mezal,
Peyser cêreno ra yeno destethal.
Niadano ke bıra hao rae sero romerdiyo,
Nêzoneno ke bıqariyo, ya ki bıherêdiyo.
Hes vano: »No çıko to ard mı sare Bıra!
To vengê mı kerd ve çar kosê dina, çıra?
Ez zonu ke bırayêna mın u to sısta,
Torjên wertê çarê mıro de, çı quweta to ke esta!«
Feqır torjên ceno dano wertê çarê bıray ro,
Goni vêrdina ra ser, Hes sono wertê bırri ro.
Wertê ra ke xeyle waxt sono,
Feqır reyna rastê Hêşi yeno.
Hes musneno cı çarê xo, vano: »Niade bıra!
Hurênda dırvêta torjênê to menda çarê mıra?
Hama perso ke to dayvi mı bıra,
Xızır bo ke, qe nêşiyo mı vira!«
Hes bırrino ra bıray (!) ra, sono xorê hên,
Vano: » So raa xora, tode nêbena bırayên!«
Hes oncino sono xorê gıran gıran,
Feqır ki oncia kuno halo vıren!
Cozır vanê: »Dırvêta kardi bena wes, dırvêta zerri nêbena wes!«
