Hesê bırri be feqiri ra
Wikipediya ra, ensiklopediya xosere
Rozê dewızê sono geme ra koliu ano. Hesê rastê cı beno, sılam dano cı, sılam ceno. Peyniye de Hêşi de bırayên girêdano. Hes cırê geme ra koliu keno top, dewızı ki beno koliu suke de roseno, pê tidarekê xo nano ro. Hes sono çê mordemeki, mordemek ki sono çê dey.
Hes rozê bırr de darhemgêne vêneno, bırayê xorê tey ceno sono meymanên. Hes çê bıray de ke niseno ro, gênde keno. Cênıka mordemeki vana: »Uff! Kami ard no Hes kerd na zere!«
Hes hesneno. Roza bine Dewız oncia sono ke geme ra koliu biyaro, Hes kuno vıreniye vano: »Bıra!« »Ha!« »Tı ke meşte ama, na torjênê xo hên ke soneke, muye wedaro, bijê bê!«
Mormek vano: »Ya.« Torjenê xo sonekeno sono geme. Hes yeno vıreniye. Vano: »Bıra!« »Ha!« »Na torjenê xo hıng ke, vera wertê sarê mıde pırode!« Dewız vano: »Yaw ma bırayme, ez çaê torê di!« Hes vano: »Neê. Tı ke mıro nêdana, ez to won!«
Neyse mejmuri maneno, torjen dano we dano çarê Hêşi ro. Dano çarê Hêşi ro, koliunê xo ki barkeno ke şêro, Hes vano: »De so roza çewreşi bê!«
Mordemek sono, çewres roze moreno sono. Sono, Hes yeno vıreniye. Çarê xo musneno cı; eke çarê xo biyo wes, tede khul nêmendo. Vano: »Bıra!« »Ha!« »Niade, hurêndia şimşer u tıfongi bena wes, oncia tharva qesê xıravıni wes nêbena!... Niade, dırvêtia mı biya wese, qesa cêniya to mı vira nêşiya! Na koliunê xo barke so, reyna meyê! Tı berê ita, to xınc kon!«
Dewız yeno çê, reyna nêtoreno şêro geme.
Bırayên hêniya işte!
Qeso xıravın vajiya, bırayên cê vışiye!
