Kam cınyandê xü ra tersenê?
Wikipediya ra, ensiklopediya xosere
Rocê dewê dı camêrdi meydan dı tiji verdı ronıştê u camerdeya xü pêrêvanê. Harun zi erzeno u vano;
-La vızêr mı qırmeyê xü eşt xü doşi u kewta ray. Hıma ez senin dew ra vicyaya teber xezalê do çım siya, lıng sıtun, qelaw u ruwenın kewtı mı ver. Tıfıng mı destı hıma mı xü eşt érd. Mı nişan gırot u mı tetıki ant u xezali ra qijiniyê do vıcya vıllı goşi kerdê ker. Cemétı miyan ra hıma ju erzeno vano;
-La Harun zuri mekı ka ma goştê na xezali nê di u ma nê werd. Ka koti dı ro na xezala to?
-Yaa..mı xezali ard kêye u cınya mı senin xezali di nê di bi qiriniya cı u xeberi pisi da mı u ecdadê mı. Hıma qirayê u vatê; "Na heywanerı tiya ra berı. Goştê na heywaneri nê kewno qüşxana da ma" Mı seke senêke mı nê şa vekê cı tepşa. Mı da pıro u çımê cı kerdi siyay u mı hıma güleyê da fekdê tıfınger u mı teqna. Allah tayın merdıman raşti reyneno. Kêyna kütıki xü eşt teber merden ra reya. Mı zi xezalı eşt kütıkan ver. Ceméti ra ju hıma erzeno vano;
-La vıllı, hélal bo to rê. La raştey zi tı camêrdê. Ez cınya xü rê çiyê wuni bıkerase kêy mı veşneno. Ez nê, a tıfınger gino u nano mına. Harun vano;
-Bıra gerek merdım tayın camêrd bo. Cınya gerek cayê xü u hédê xü bızanê. Vıllı sileyê dana pıro felegê xü şaş keno. Cınya çıçiyo. Camêrdê koley cınyay, zaten camêrd niyo. Xü rê şırê leçeki bı erinê. Qıseyê Harun qedêno nê qedêno ézanê ine vêydano. Cemét werzeno şıno cami u nımazê xü yê ine kenê. Dıma nımazi xoca wézi dano u wézi tepya xoca vano;
-Ez ewro wazena şıma rê çiyê vaca. Zuri günayo. Merdımo kı zuri kenê merdım nêşeno qinê ina kero. Kêyê zurkeri bıveşo kes inan nê keno. Ewro edo şıma ra çiyê bıwaza u waştena mı noyo, şıma do zuri nê kerê. Cemét vano; "vıllı bilı, bı namedê xızırê xocay ma do ewro zuri nê kerê u cüwabê to raşt bıdê." Na vateni tepya xoca werzeno cemét ra pers keno u vano;
-Camêrdêno şıma kam cınyandê xü ra tersenê?
Cemét hema fınêdı werzeno pay. La Harun zi herunda xü dı ronışto u nê werzeno pay. Xoca vano;
-Harun tı çırê nê werışti? Tı cınya xü ra nê tersenê?
Harun zi erzeno u vano;
-To qalê cınyar kerdse saqayê mı şıkyay ez senin werza pay.
