Býarbókasavnið
Frá Wikipedia, hin frælsa alfrøðin
Býarbókasavnið er fólkabókasavnið í Havn. Býarbókavørður er Anna Brimnes, og afturat henni eru 13 starvsfólk í føstum starvi umframt bókauppsetarar (frítíðararbeiði hjá skúlanæmingum). Øll kunnu læna á bókasavninum, bæði bøkur, ljóðbøkur, filmar og bløð.
[rætta] Stutt um Býarbókasavnið
1969 Tórshavnar kommuna setti Býarbókasavnið á stovn 1. apríl í leigaðum hølum í Niels Finsens gøtu 7. Støddin var 514 fermetrar.
1990 Bókasavnið leigaði eina hálva hædd afturat.
1993 Hølini, ið fyrr vóru tekniska deild hjá Tórshavnar kommunu, vórðu tikin upp í bókasavnið. Bókasavnið er nú 813 fermetrar í 4 hæddum, á 1. hædd er inngongd, á 2. hædd er avgreiðsla, lesistova og útlán fyri vaksin, á 3. hædd er barnabókasavnið og skrivstovur, og á 4. hædd er goymsla, skrivstova og starvsfólkahøli.
2006 fekk bókasavnið lyftu.
[rætta] Býarbókasavnið, bøkur, tilfar og virki
Bókasavnið eigur o.u. 74.500 bøkur og tíðarrit (2005). 91.508 vitjaðu bókasavnið í 2005. 6 teldur eru fyri brúkarar til internetnýtslu, 1 arbeiðstelda til at skriva umsóknir, uppgávur og tílíkt, 5 teldur eru til innnanhýsisleiting, 2 spæliteldur eru á barnabókasavninum (2005). 10 skúlabókasøvn í Tórshavnar kommunu og Kollafjarðar bygdar- og skúlabókasavn samstarva við Býarbókasavnið. Bókasavnið hevur samstarv við 6 stovnar (ellisheim, Varðhaldið o.t.) í býnum um útlán. 11 fulltíðarstørv eru á bókasavninum, 5 skrivstovufólk, 5 bókavørðir og býarbókavørðurin. Í hesum størvum eru sett 14 fólk.
1982 fór bókasavnið at læna út ljóðbøkur.
1998 varð alt tilfarið skrásett á teldu.
2004 fór bókasavnið at læna út dvd-filmar.
2005 varð nýggj, nútímans telduskipan keypt og sett í verk.
