Aktyalite
From Wikipedia
Atik sa tiré dé Alter-Presse Ayiti Copyright li résèvé
Ayiti : Ka a grav [25/11/06] Sitirasyon peyi a parèt ap angrave nan plizyè nivo. Pandan eleksyon teritoryal yo prevwa fè 3 desanm k ap vin la a ap vanse, sitirasyon sekirite a ap degrade, patikilyèman nan Pòtoprens. Vyolans la rekoumanse ap monte epi enkyetid ap toumante yon bann fanmi. Nan koumansman semèn pase a, gwo afwontman ant gang rekoumanse nan katye Gran Ravin (sides kapital la) kote 4 moun mouri epi 17 lòt blese. Pandan semèn nan tou, gwoup ame simen tansyon nan mitan kapital la, kote yo tire kout zam epi lage panik pami pasan ak komèsan. Sa jennen aktivite ekonomik yo. Paralèlman plizyè sektè kontinye manifeste pou mande pou sòlda Misyon Nasyon Zini pou Estabilizasyon Ayiti (MINUSTAH) kite peyi a. MINUSTAH ak Lapolis di y ap fè jefò pou kenbe yon sitirasyon estab pou pèmèt eleksyon 3 desanm yo dewoule kòmsadwa. Men ka kinapin ap miltipliye san rete. Ka yon jèn fi, Natacha Dessources, bandi te kidnape semèn pase epi touye malgre fanmi l bay yon ranson, fè anpil moun fremi. Menmjan tou, pa gen soulajman tout bon nan posiblite pou manman ak papa pitit fè fas a bezwen pitit yo, malgre yon ti bès sou pri gazolin. Fèt finisman ane a ap pwoche nan yon kapital k ap kokobe anba fatra. Sitirasyon sa a afekte plizyè nan gran vil yo tou. Inondasyon ki frape kek zòn nan Nò peyi a pandan semèn sa a, se apse sou klou. [25/11/06]
E-mail AlterPresse : alterpresse@medialternatif.org
