Scrapie
De Wikipedia, le encyclopedia libere
Scrapie es un maladia encephalic de oves causate per priones. Scrapie es le prime cognoscite maladia de iste sorta, ben que on naturalmente non sapeva le causa quando le maladia esseva describite pro le prime vice ante 250 annos. Altere maladias causate per priones es le maladia de Creutzfeldt-Jakob e le kuru de homines e le maladia del vacca folle (encephalopathia spongiforme bovin) de vaccas.
On crede que priones de oves es le causa del prime casos de ESB de vaccas ma il ha opiniones divergente super le question si homines pote esser infectate per carne de oves. Le scrapie pote esser transmittite inter oves per contactos, lo que non pare esser possibile inter vaccas con ESB. Le durata de incubation es longe, circa 2 annos.
Le symptomas es hypersensibilitate a stimulos externe e prurito que pote esser tanto intense que le lana pote disparer totalmente de areas symmetric del collo, del pectore e del partes posterior. Altere symptomas es parve spasmos in le facie, le labios e le aures. Le maladia sempre fini per morte.
