Edgar de Wahl
From Wikipedia
Edgar de Wahl, li creator de Interlingue, nascet in Olwiopol, Russia (hodíe Pervomaysk, Ucraina) li 11 august, 1867 (secun li julian calendare). Il studiat in Sankt-Peterburg, e laborat li plu grand parte de su professional vive in li estonian cité Tallinn (anc conosset quam Reval) quam instructor de matemática e physica in licéo.
In prim un adepte de Volapuk, e de li lingue Neutral (de Wahl esset co autor de Reform Neutral con Rossenberger), de Wahl plu tard esset un del unesim usatores de Esperanto, e consiliat Zamenhof pri quelc punctus de grammatica e vocabules por ti lingue. Il abandonat ti lingue pos pluri annus e durante li sequent decennies il laborat sur li problema del ideal forme de un international auxiliari lingue. De Wahl esset anc autor in 1909 de un project naturalistic de lingue. De Wahl esset oficero del marine russ durant li prim guerre mundal.
In 1922 il publicat un "clave" a un nov lingue, Occidental, e li unesim numeró de un periodico titulat Kosmoglott (plu tard Cosmoglotta), scrit in ti lingue. In li sequent annus, de Wahl partiprendet in li discussion pri Occidental, e permisset li lingue evoluer gradualmen secun li recomandationes de su usatores. Fotografies montra de Wahl in companie de Prof. Otto Jespersen, autor del Novial, in 1935 e pruva li intercambios ínter li currentes linguistic. Pos li comense del duesim guerre mundal in 1939, il havet solmen intermittent contacte con li occidentalist movement, a ti témpor centralisat in Svissia. Il vivet li ultim annus de su vive in un sanatoria in Estonia e morit in 1948.
(Li nómine de Occidental esset changeat a Interlingue in 1949.)
ligas exteriori: http://www.geocities.com/Athens/Parthenon/1222/remin.html (a http://www.geocities.com/Athens/Parthenon/1222/occ.html ).
