Bagong
Saka Wikipédia, Ènsiklopédhi Bébas ing basa Jawa / Saking Wikipédia, Bauwarna Mardika mawi basa Jawi
Bagong iku dicipta seka wewayangane Semar. Mula saka kuwi, prejengane ora beda adoh. kaya dene wewayangan, Bagong awake ireng. Tinimbang anake Semar liyane, Bagong paling kurang ajar. Basa Jawane ora karuwan. Dheweke seneng ngritik apa wae.
Bagong iku asline jenenge cukuran rambut. Bocah yen dicukur plonthos kabeh, jenenge gundhul. Yen sing diturahke mung ngarep thok jenenge kuncung. Yen sing diturahke ing mburi dijenengi kuncir utawa kucir. Yen rambut sing sisa ana sisih tengen utawa kiwa jenenge pethek. Nah bagong iku kanggo wong sing rambute mung ana ing mburi sisih ngisor (cedhak gulu). Cukuran bagong uga disebut gombak.
Yen dideleng seka pawakane, Bagong pancen memper Semar. Nalika Sang Hyang Ismaya didhawuhi mudhun ing ndonya dening Sang Hyang Tunggal, Sang Hyang ISmaya njaluk diwenehi kanca. Kaya dene lumrahe panakawan kang artine kanca kang nyekseni, paling ora panakawan ana loro. Sanghyang Tunggal banjur gawe bagong seka wewayangane Semar.
Bagong nduwe bojo jenenge Dewi Bagnawati lan urip ing padhepokan Klampis Ireng.
Ing panggonan liya, Bagong sok diganti jeneng. Ana kang diowahi urutan keluwargane. Ing Jawa Tengah, bagong iku anak ragile Semar. Dene ing panggonan liya, paraga kaya Bagong iki dadi pambarepe. Ing panggonan liya iku, Bagong sok diganti dadi Bawor, Carub, utawa Astrajingga
