Gathotkaca
Saka Wikipédia, Ènsiklopédhi Bébas ing basa Jawa / Saking Wikipédia, Bauwarna Mardika mawi basa Jawi
| Gathotkaca | ||
|---|---|---|
 Gathotkaca. |
||
| Jeneng miturut basa | ||
| Basa Sangaskreta | Gathotkaca | |
| Jeneng miturut aksara | ||
| Dewanagari | घटोत्कच | |
| aksara Bali | ||
| aksara Jawa | ||
Gathotkaca utawa Gathutkaca iku sawijinig paraga wayang Mahabharata. Dhèwèké putrané Wrekodara.
Bab lan Paragraf |
[sunting] Lair
Nalika isih cilik jenenge Tetuka utawa Tutuka. Gathotkaca lair seka Arimbi lan Bima. Arimbi iku sejatine anake raseksa, Arimba. Mula nalika isih bayi, Tetuka nduwe siyung. Siyung iku banjur ditugel. Ari-arine uga angel ditugel, bisane mung nganggo Panah Senjata Kunta. Panah iki banjur dadi duweke Adhipati Karna. Laire Gathotkaca ngepasi karo ontran-ontran ing kayangan. Jagad dewa gonjang-ganjing amarga diamuk dening Pracona. Jarene, sing bisa ngalahke iku mung tetuka. Bocah sing lagi lair iki banjur dicemplungke ing banyu gege lan Kawah Candradimuka. Ing kono kabeh gaman-gaman sekti dikumpulke dadi siji dicemplungke ing kawah. Tetuka langsung dadi gedhe. Otote kuat kaya kawat, balunge sekti kaya wesi. Rupane uga diwenehi topeng waja. Awake ora mempan dening gaman.
[sunting] Bojo lan Anake
Gathotkaca banjur dadi raja ing Pringgondani. Raja enom iki nduwe bojo telu:
- Dewi Sumpani, peputra Arya Jayasumpena.
- Dewi Pregiwa, peputra Sasikirana.
- Dewi Suryawati, peputra Suryakeca.
Ing sendratari, Gathotkaca asring katon ing Gathotkaca Gandrung. Tari iki nggambarke nalika Gathotkaca wuyung marang Pregiwa.
[sunting] Paman lan Aji-Ajine
Gathotkaca kondhang sektine. Aji-ajine:
- Narantaka = bisa mabur. Aji-aji kanggo amarga yen mateni mungsuh, Gathotkaca seneng mlintir gulune nganti tugel. Aji-aji iki entuk seka Seta. Amarga bisa mabur iki, Gathotkaca kejibahan njaga Amarta seka langit. Iki dadi pralambang ing kaprajuritan, amarga sedulur liyane, Antareja lan Antasena kejibahan njaga dharatan lan laut.
- Siyung Brajadenta. Brajadenta asline pamane dhewe, nanging banjur manuksma mlebu ing siyunge Gathotkaca.
- Brajalamatan. Brajalamatan uga jenenge pamane. Nalika palastra, Brajalamatan manuksma ing tangan kiwa Gathotkaca.
- Brajamusti. Brajamusti iku uga pamane. Nalika palastra manjing ing tangan tengene.
- Brajawikalpa. Kaya aji-aji liyane, Brajawikalpa kuwi seka pamane dhewe kang manjing dadi rajah ing geger.
Para pamane kang dadi aji-ajine, maune mbrontak ing Pringgondani nanging bisa ditumpes dening Gathotkaca. Ana salah sijining pamane kang mbela gathotkaca, yaiku Kalabendana. Nanging Kalabendana iku jujur, lan sawijining dina dipateni dening Gathotkaca amarga ngomong sanyatane ngenani Abimanyu. Crita iki ana ing lakon Gathotkaca Sraya.
[sunting] Ing Bharatayudha
Ing Bharatayudha, Gathotkaca bisa mateni Dursala, anake Dursasana. Raja Pringgondani iki pancen ora bisa dipateni nganggo gaman, kejaba mung panah Senjata Kunta. Nalika nugel ari-arine, sarung Senjata Kunta keri ana ing awake Gathotkaca, mlebu ing wudel. Gathotkaca mati dening Adhipati Karna kang dibiyantu dening Kalabendana. Pamane iki wis janji ora arep munggah swarga tanpa bareng ponakan kang paling disenengi. Crita Gathotkaca Gugur klebu crita sing miris lan kebak adhegan perang kang apik.
