Wisanggeni
Saka Wikipédia, Ènsiklopédhi Bébas ing basa Jawa / Saking Wikipédia, Bauwarna Mardika mawi basa Jawi
Wisanggeni iku anake Arjuna karo Dewi Dresanala. Putri iki salah sijining widodari anugerahing dewa amarga Arjuna bisa ngalahke Prabu Niwatakawaca, buta kang ngobrak-abrik kahyangan. Nalika kuwi, Niwatakawaca sedya ndhaup Dewi Supraba.
Pas lair, Wisanggeni arep dipateni dening simbahe, Bathara Brama. Bathara Guru nganggep laire Wisanggeni nyalahi kodrat. Nanging Wisanggeni wis dikodratke sekti lan tinitisan Sanghyang Wenang. Seka perkara iki, Wisanggeni uga asring sinebut dewa kang pungkasan.
Satriya setengah dewa setengah manungsa iki dimomong Bathara Baruna (dewa kang nguwasani samudra) lan Hyang Antaboga (raja ula kang urip ing dhasar bumi). Dheweke bisa mabur, ambles bumi, lan urip ing laut.
Dheweke urip ing Kahyangan Daksinapati bareng ibune. Sektine ngluwihi liyane. Wisanggeni raket karo Antasena. Loro-lorone uga ora melu Bharatayuddha. Ing lakon Wisanggeni Racut, dheweke muksa bareng karo Antasena dadi tumbal ben Pandhawa menang.
Kaya dene Antasena, Wisanggeni uga ora seneng nganggo basa krama. Beda karo Antasena kang lugu, Wisanggeni lantip lan ngerti sadurunge winarah.
