Köbes (Berof)
Us de Wikipedia
Dä Aatikkel verzallt vunn däm Berof Köbes. Willze mieh wisse watt_et noch heijße ka, luurenß unger Köbes (Watt ėßß datt?)
Dä Köbes is dä Jong dä dat Kölsch oda in Düsseldorf oda Krieevel och dat Alt (För ze Drinke) op dä Disch bringk.
Dä Köbes hat en blaue Vüürbinder aa unn en Ledertäsch. Fröher (unn in ville Brouwhäuser o_no hück) moot hä et Bier an dä Thek selvs zahle bevor er et an dä Jast verkäuf. Hä hätt Kölsch-Kränz wo Lösher hänn för de Kölsch-Stange. Ma säät dat fröher de Köbes kej rishtije Kellner woor unn daröm hätt ma ihm kej Tablett jevve könne (do wöör allet umjefalle) unn och nicht vertraue könne dat hä et Jeld aajivvt.
Woröm dä Köbes heijß weijß hä selvs nit suh jenau. Et iss en aale Bejriff dä sesh ald vüür 200 Johr dorshjesetzt hätt. Ma säät dat domohls ville jonge Lück als Köbes jeaabeijtet hänn wo op däm Wääsch woore noh dem Jrab vum hillje Köbes in Santiago di Compostela (dat iss en Spanie). Dat woore dann de Köbespiljer, unn desderwejen hätt ma se eijfach Köbes jenannt. Ob dat stimmp? Ma weijß et nit.
Köbes iss nit eijfach en Kellner, Köbes iss en Beroofung. Dä Köbes iss stäts däm Kölsch verpflishtet unn nit dem Jast. Ma sollt ihm nit im Wääsch stehe. Dä Köbes nimmt da leere Jlas fott unn brink en Neues, ob do dat nu willz oda nit. Wollze kej Kölsch mieh mooßte en Bierdeckel op dat Jlas donn, dann weijß hä Bescheid.
