Bløf
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
Bløf is 'ne Nederlandse (Ziewse) rockband dee op 't Nederlands zingk. Heer besteit oet Paskal Jacobs (zaank, gitaar), Bas Kennis (toetse, zaank), Peter Schlager (basgitaar, zaank) en Norman Bonink (dröms). Bløf woort in 1992 opgeriech door e paar Middelburgse ex-sjaoliere. Algaw beginne ze mèt 't sjrieve vaan eige nómmere, en in 1995 bringe ze hun ierste plaat oet: Naakt onder de Hemel. Inmiddels stoon ze bij EMI oonder contrak, daankzij 't zakelik wèrk vaan drömmer Henk Tjoonk. 't Nómmer Aan de Kust, euver Zieland en zie toerisme, weurt in dezen tied al hendeg bekind in Zieland; later zal 't nog ins figurere op Helder (oetgebrach in 1997) en weurt daan 'ne nationalen hit dee de band ouch boete de provincie groete bekindheid gif. In 1998 trejt de band mèt 't Zeeuws Orkest op. De albums Boven (1999) en Watermakers (2000) sjete zoonder väöl meujte d'n Album Top 100 binne. Wienie op 17 miert 2001 d'n drömmer Chris Götte stirf nao e motoroongelök kump de activiteit vaan de band stèl te ligke. Wienie ze evels besloete toch door te goon kump d'n opvolger, Blauwe Ruis, al 'tzelfde jaor in de winkel te ligke. De nuien drömmer weurt Norman Bonink, dee aongetrokke is oet de begeleiingsband vaan Frank Boeijen. In 2003 kump Omarm oet, mèt es technische bezoonderheid tot de sjief op SACD-formaat geproduceerd. Hei-op figureert oonder aandere bandoneonis Karel Craayenhof. 't Jaor 2006 brach 't album Umodja, boeveur de band de wereld euver toerde en de songs in daartien versjèllende len opnaom.
