Eindhove

Van Wikipedia

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.

Ligking vaan Eindhove in Noord-Braobant

Eindhove (officieel Eindhoven) is 'n stad in 't zuidooste vaan de Nederlandse provincie Noord-Braobant. De gemeinte Eindhove beslaot 88,28 km²; mèt op 1 januari 2005 208.573 einwoeners is de stad de vijfde vaan Nederland en mèt veursproonk de ierste vaan Noord-Braobant. Börgemeister is Alexander Sakkers vaan de VVD. De stad is 't technologisch cintrum vaan Nederland en weurt wel de Hollandse Leechstad geneump.

[bewirk] Stadsgeziech

Statie

Eindhove zie cintrum kint weineg historisch gebouwe, umtot de stad pas laot tot oontwikkeling kaom. Monuminte zien veural vaan nao 1900, wie 't Van-Abbemuseum, de statie (mèt e front in de vörm vaan 'ne radio), 't Evoluon en de leechtorie vaan Philips NV.

[bewirk] Stadsfuncties

De electronica-industrie, mèt es cintrum Philips NV, beet wèrk aon väöl minse en heet in 't verleje veur väöl arbeidsmigratie nao Eindhove gezörg. Roontelum die industrie is ouch 'n educatief infrastructuur oontstoon, mèt es veurnaomste vertegewoordeger de TU Eindhove, die de stad 'n rilletief jóng bevölking gif. Wijers is de stad verzörgingscintrum veur hiel Zuidoos-Braobant, en in meender mate hiel Oos-Braobant en Noord-Limburg.

[bewirk] Historie

Eindhove oontstoont es nederzètting aon de Dommel, en kraog in 1232 stadsrechte vaan graof Hendrik I van Braobant. De stad greujde evels oonder de rouk vaan Wiert en De Bosj neet oet tot e veurnaom cintrum en in 1583 woorte de walmör zelfs aofgebroeke, boemèt 't stedsje e dörps karakter zouw hawwe tot wied in de negentiende ieuw.

Mèt de Industrieel Revolutie kierde 't tij. 't Bekinds en veurnaoma waor de eupening vaan 't Philips-lampefebrik in 1891. meh ouch textiel- en laoter oto-industrie (DAF) vestegde ziech dao. In 1920 woort de gemeinte oetgebreid mèt de aon Eindhove vasgegreujde aw kèrkdörper, boemèt 't in eine kier 'n stad vaan beteikenis woort. Nao d'n Twieden Wereldoorlog is Eindhove 'n industriestad geblaove, al kaom de IT-sector mie en mie op.