Kepèl
Van Wikipedia
Dit artikel is gesjreve in 't Heljes. 't Weurt gewaardeerd óm in dit artikel 't Heljes aan te hauwe of aan te gaeve welk anger dialek gebroek is.
Kepèl of Panninge (Nederlands Panningen) is 'n dörp in de Nederlands-Limburgse gemeinte Helje, vasgegreujd aan 't dörp Helje wat t'n oeëste van Kepèl ligk. 't Dörp heij op 1 januari 2006 7777 inwoeëners en is daomèt de groeëtste kern van Helje. Bovedeen steit in Kepèl 't raodhoes van Helje.
Kepèl is genumt nao de in 1643 gebouwde kapèl, die de ganse gemeinte veurzoog. Toen in de negentiende ieëw de religieus belaeving veul intenser woort mós me de kapèl oetbouwe tot 'n echte kèrk. In 1929 woort de aoj kepèl aafgebroke en door 'n ni-j kèrk vervange van arsjitek H.W. Valk. Ze rakde in 1944 zwaor besjadigd mer is daonao gerestaureerd.
Kepèl is 'n belangriek regionaal centrum: 't veurzuut de umgeving van sjoeële, wèrk in d'n deenstesector en winkels.
Beij Kepèl, allewiel aevel mieër beij Beringe, mak de Panninger Linie 'nen dreij. Dees isoglos (de grens tösse slaope en sjlaope) is dan ouk nao dit dörp genumt.
