Pierre Bakkes
Van Wikipedia
- Dit artikel is gesjreve in 't Moferts. 't Weurt gewaardeerd óm in dit artikel 't Moferts aan te haje.
Pierre Bakkes (gebaore in Mofert 1941) is bekindj es de ieërste streektaalfunctionaris in Nederlands Limburg. Hae haet de functie vief jaor oetgeveurd wie 'r in op 16 juni 2006 mit pensioen ging. In 1997 krege de Limburgse dialekte de officieel status van streektaal. Naeve de oprichting van 'ne Raod veur 't Limburgs zoog me de noeadzaak van 'ne functionaris, dae de belangstèlling veur 't dialek op väöl menere zou kónne stimelere. Bakkes waas hie de pionier. Same mit Jan Notten e.a., van Veldeke-Limburg waerde de spelling van 't dialek aangepas. In 2003 versjene de nuje aanwiezinge veur de spelling. Ouch versjene lesbeukskes veur dialekóngerwies op de sjoeale. Dees hove allein nag mer aangepas te waere aan 't plaatselik dialek.
Veurdet Bakkes streektaalfunctionaris wearde, wèrkdje hae es docent Nederlands aan de hoeagesjoeal in Zittert. Daoneve zit'r in 't bestuur van Veldeke-Limburg en in de redaktie van 't vereinigingsblaad. Pierre sjrief ouch gedichte in 't Moferts. 'n Groeat aantal artikele in 't plat en euver 't plat waerde gepubliceerd. Ambtelikke stökker sjrief 'r in 't dialek of twieëtalig: Moferts-Standaardtaal. Hae sjreef 'n book euver 't Venloos, Zitterts en Remunjs in de reeks Taal in stad en land en haet zitting in de eindredaktie van 'n paar bloomlaezinge in de streektaal, ó.m. Mosaiek, nr 12 van Veldeke-Literair. Bakkes is al decennia bezig mit zien laeveswèrk: `t Moferts waordebook.
Aan 't inj van de jaore 90 promoveert Bakkes mit 'n óngerzeuk euver 't dialek van zien geboorteplaats aan de Universiteit van Nijmege.
