Sjteebusjkapel
Van Wikipedia
Dit artikel is gesjreve in 't Norbiks. 't Weurt gewaardeerd óm in dit artikel 't Norbiks aan te hauwe of aan te gaeve welk anger dialek gebroek is.
De Sjteebusjkapel ligkt langs 'ne vaeldwaeg in Sjoppem, 'n gehuch va Voere ('s-Gravenvoere). De kapel is geboewd va reste va 'ne Romeinse villa, dae dao in 1850 dör d'r toenmalige burgemeester en historicus Delvaux is opgegrave en oetveurig in 't Fraans is besjraeve. Naeve boewmateriaal is och o.m. 'n munt oet d'r tied va Nero gevoonde en glaze vörwerpe.
[bewirk] 't Boewmateriaal
't Oondersjte deel van de kapel is gemakt va breuksjteen in veerkaente bluk gekapt. Dit is gee Romeins materiaal. De laog dao-op is van Romeinse baksjteen of tegulae. Gaanse broksjtukke Romeinse moeër mit d'r Romeinse specie nog d'r tussje, zeunt aaneengemetseld. Dae specie is te herkenne an de kling sjtukskes baksjteen (van kapotgevalle panne of tegels) d'r tussje. Dao-op trift me dan 'n laog, in veerkaente blukskes gehowwe zaandsjteen aan. Typisch vör Romeinse boewwerke, och in Rome. De volgende laog besjteet oet in veerkaente blukskes gehowwe tufsjteen. Dizze sjteen is hie neet in de buurt te vinge en waoërt och gaer gebruukt dör de Romeine in Rome. Dizze tufsjtee is warsjienlek aafkomstig oet de Eifel. De daakpanne besjteunt noe oet modern panne mae nog 'n 10 jaor truuk loge authentieke Romeinse daakpanne op dis kapel. Wie, mit 't opkaome van de toeriste, de ing nao de aander pan verdween, hat me besjlaoëte ze te vervange en urgens veilig te beware. De kapel wert nog gebruukt väör 'n jaorlekse aoëpeloch-mis en bie de broonk.
[bewirk] D'r naam
D'r Romeinse villa zow roond 't jaor 300 n. Chr. verwoest zieë. Roond 1600 wert d'r busj, dae op die plaatsj dör de jaore heen waor oontsjtaande, oontgonne en de luuj veende bie 't oontginne en ploge boewmateriaal dat ze neet kinne. D'r toponiem Sjteebusj liegkt vör de haand mae dae verklaord neet wie die broksjtukke moeër dao kaome. Dat dao 'ne Romeinse villa how gesjtaande wisse de luuj roond 1600 neet. Voere is neet permanaent bewond gewes vanaaf de Romeine, zjuus wie de res van d'r sjtrieëk neet. Zoe zal 't volksverhaol De verzoonke sjtad van Ribbi oontsjtande zieë, dat zich zjuus hie aafgesjpeuld zow hubbe. In die sjtad laefde luuj die neet doogde en d'r èèges vör gezurgd haant dat ze vergonge. Mit Kaeërsjmis zow me de klokke van de kirk van Ribbi nog kinne hure loewe. 't Thema van verzoonkde plaatsje is universeel en vindt me waeltwied truuk in volksverhaole.
[bewirk] De Kruushieëre
De kapel wert, es wie alle waegkruutser en kapelle in Voere, oonderhaowe dör 'n vereniging die zich de Kruushieëre va Voere neumt.
