കര്‍ണ്ണാടക സംഗീതം
വിക്കിപീഡിയ, ഒരു സ്വതന്ത്ര വിജ്ഞാനകോശം.
കര്‍ണ്ണാടക സംഗീതം(Carnatic Music) ദക്ഷിണേന്ത്യയില്‍ ഉടലെടുത്ത ശാസ്ത്രീയ സംഗീത ശാഖയാണ്‌. മറ്റ്‌ ഇന്ത്യന്‍ ശാസ്ത്രീയ സംഗീത ശാഖകളെപ്പോലെ രാഗവും താളവുമാണ്‌ കര്‍ണ്ണാടക സംഗീതത്തിന്റെയും അടിസ്ഥാനം. അനുഗൃഹീതരായ നിരവധി സംഗീത പ്രതിഭകളുടെ പരിശ്രമങ്ങള്‍ക്കൊണ്ട്‌ ഈ സംഗീത സമ്പ്രദായത്തിന്‌ ഇന്ന് ലോകത്തെല്ലായിടത്തും വേരോട്ടമുണ്ട്‌.
കര്‍ണ്ണാടക സംഗീത കൃതികള്‍ ഭൂരിഭാഗവും മതപരമാണ്‌. ഹിന്ദു ദൈവ സ്തുതികളാണ്‌ അവയില്‍ മിക്കതിന്റെയും ഉള്ളടക്കമെങ്കിലും ജാതിമത ചിന്തകളില്ലാതെ ഈ സംഗീത ശാഖ അംഗീകാരം നേടിയെടുത്തു.സ്നേഹത്തെയും മറ്റ്‌ സാമൂഹിക വിഷയങ്ങളെയും പരാമര്‍ശിക്കുന്ന കൃതികളും ഈ സംഗീത ശാഖയില്‍ രചിക്കപ്പെട്ടിട്ടുണ്ട്‌.
