Klootscheetn
Van Wikipedie
Klootscheetn is n oald gebroek dat al besteet zolange leu t zik köant heugn. Der goat verhaaln dat de faraos oet Egypte t al spöald hebt. Ook warn de Iern der al vroo met gangs. Duur restrikties van gröttere stean, umdat t vuur völ verneling en smangs zölfs reln zorgn, en oonder druk van völ riek haandelsvolk dat van boetn Nederlaand kwam an t eande van de middeleeuwn en t opkomnde Kalvienisme, wör de sport laankzaaman n spöl vuur de leegere klasn.
Vandoar ook n naam klootjesvolk.
t Schient dat, duurdat Ierlaand nog n zetjen van Prins Willem van Oranje was, t klootscheetn doar n opleaving hef keand en tot an vandage gereageld spöald wördt. Duurdat der in Tweante en n Achterhook de leste decennia völle andach an kultuur scheunkn wördt, hef der in disse umgeaving ook ne opleaving plaats had. Ook in Duutslaand en Italiën is n ankötteln van serieuze spöllers te zeen.
t Geet t klootscheetn zelfs zo good dat der al nen internationaaln boond van besteet, den elk joar wearldkampioenschapn organiseert.
[bewark] t Spel
t Is n balspel dat duur joonk en oald spöald wördt. Der bestoat verschilnde variaantn:
- n Scheidsrechter bepoalt vuurof woer t eandpeunt is. De spöllers mut dan in zoo min meugelik smette den bepoaldn ofstaand oflegn.
- De spöllers sprekt met mekoar de spöltied of. Wee in dee tied met de meenste smette zo veer meugelik kömp, hef wunn.
n Bal (of kloot) hef nen diameter van ongeveer 5,6 cm en is van vrogger oet van hoolt en an de binnkaante met lood of iezer ingötn.
