Sallaands
Van Wikipedie
't Sallaands is een Nedersaksisch dialect dät espreuken wördt in 't westen van de de Nederlaandse pervinsie Overiessel, um percies te wezen in de regio Sallaand en dus ok in de dörpen Ellendoorn, Nieverdal en Olten die vandäge de dag een nauwe baand mit Twente ebben. Wieder praoten ze in Kampen en in de umgeving van Kampen ok Sallaands. In de Kop van Overiessel dät eigenlijks ok bi'j Sallaands eurt, praoten ze gien Sallaands mär Stellingwarfs. Raolte leg bi'j benaodering midden in 't Sallaandse täälgebied. 't Dialect mit beslis 't grootste antal sprèkers is 't Zwols. 't Sallaands ef de ISO 639-3-code sdz.
[bewark] Kenmarken
Kenmärkend veur de Sallaandse dialecten bin de korte klinkers (kettel, götte) of erekte klinkers (kètel, göte) daoras 't Nederlaands lange klinkers (ketel, goot) ef. De Iessel bi'jlanges overeerst (krek as in 't Oost-Veluws) de erekte klinkers. Wieder naor 't oosten e-j de korte klinkers.
Karakteristiek veur 't westelijke Sallaands net as veur 't Veluws is de uutspräke van de korte a, zoas in 't Engelse cat: värve.
In 't oosten van Sallaand wördt in plaotsen as d' Am, Ellendoorn en Nieverdal een overgangsdialect mit Twentse invloeden espreuken. Kenmärken iervan bin een oo daoras 't Nederlaands een oe ef (stool/stoel), gien n in 't meervold van sommige woorden (huze), en drie woordgeslachten. [1]
[bewark] Verspreiding
't Gebied daoras ze Sallaands praoten, komp niet sekuur overiene mit 't gebied dät Sallaand enuumd wördt. De täälkundige Harrie Scholtmeijer [2] verdielt de Nedersaksische dialecten van Sallaand in:
- Noord-Oaveriessels boven een liende die zo'n betien onder Zwolle, Ni'jlusen en Slagaren löp;
- Vechtdals in de drie-oek Ommen-Grambarge-Vroomshoop (dit löp een entien deur in Twente);
- Sallaands in 't overige (grootste) part.
Een aandere indieling [3] is:
- Sallaands veur zwat 't iele gebied;
- Zuud-Drèents veur de plaotsen drek onder de grèèns mit Drenthe (Stappest, Rouveen, Ni'jlusen, De Balk, De Vaort, Drogteropslagen, Skunesloot, Slagaren, De Krim).
[bewark] Referenties
- ↑ Scholtmeijer, Harrie (2006), Mörn! Taalgids Overijssel, Assen: In Boekvorm Uitgevers bv.
- ↑ Scholtmeijer, Harrie (2006), Mörn! Taalgids Overijssel, Assen: In Boekvorm Uitgevers bv.
- ↑ http://taal.phileon.nl/kaart/nedersaksisch.php
 |
