Couleu d'Jèrri
From Wikipedia
|
Ch't' articl'ye fut c'menchie en Jèrriais
 |
La couleu d'Jèrri est eune rouoge crouaix en dgiagonal sus un blianc fond auve l'êtchusson d'Jèrri auve eune couronne sus.
La couleu d'Jèrri, d'pis les touos vièrs temps jusqu'à mille neu chents huiptante'tch'ieune, 'tait eune rouoge Crouaix d'Saint Patrice. Duthant l'année du Jubilé en mille neu chents septante-sept, L's Êtats d'Jèrri avaient décidé dé changi la couleu pa'ce qué nou criyait qu'not' vielle couleu n'nos distîndgait d'aut' assez.
Y'avait des gens tchi dithaient qu'not' couleu avait 'té copiée par mêprînse d'la couleu Irlandaise et don qu'nou dév'thait la changi. Mais i' n'y'a pon d'êvidence qu'la Crouaix d'St Patrice fûsse faite sèrvi coumme couleu en Irlande d'vant mille huit chents ieune, et la couleu d'Jèrri est pus vielle qué chenna, à chein qu'des expèrts vexillologiques nos dithent.
Y'a eune théorie qu'la couleu d'Jèrri date des dgèrres entre l'Angliétèrre et la France quand l's Îles d'la Manche faîthaient sèrvi lus neutralité pouor pouver faithe du conmèrce auve les deux bords. Mais coumme tchi distîndgi les batchieaux Jèrriais? Chein qu'i' fîtent est dé touônner la Crouaix d'St. George du Rouai d'Angliétèrre pouor en faithe eune crouaix dgiagonale.
Auprès des d'bats, l's Êtats votîtent pouor changi la couleu. La nouvelle couleu fut approuvée par l's Êtats lé 12 dé Juîn mil neuf chent septante neuf. Y'avait deux Députés tchi votîtent contre.
La Reine procliâmit la nouvelle couleu l'10 d'Dézembre mil neuf chent huiptante
La nouvelle couleu fut officiellement haûlîndgie pouor la preunmié fais l'7 d'Avri 1981.
