Veue (bâtisse)
From Wikipedia
Ch't' articl'ye est liée doubl'ye : vaie Veue (frouque). 
|
Ch't' articl'ye fut c'menchie en Jèrriais
 |
Eune veue (tour, lighthouse) est un mèr tch'est bâti coumme eune tou sus des rotchièrs en mé ou falaises auve eune forte veue pouor dgèrni les navidgants du dangi d'la côte.
Les preunmié veues 'taient sîmpliément des feurs satchis par l's habitants d'la côte. Ch'tait pustôt étout pouor mèrtchi l'entrée ès cauchies.
Les veues modèrnes n'ont d'aut' dé gardgiens. Les gardgiens soulaient aver à d'meuther là pouor souôt'nîn la veue, l'abréver dé fouâle, et r'graie l'engrénage tchi touônnait lé mitheux ou la leunette. Quâsiment toutes les veues au jour d'aniet sont automatiques, et y'en a hardi tchi prannent lus pouver du solé.
Pouor concentrer la leunmiéthe d'la veue, nou faîthait sèrvi un mitheux - et pus tard eune grande leunette - pouor env'yer la leunmiéthe bein au liain. Viyant qu'nou n'pouvait pon env'yer chutte leunmiéthe par touos les bords à la fais, nou faîthait touônner la leunette. L'êffet 'tait d'eune veue blyîntchante. Les navidgants peuvent èrconnaître eune veue par sa blyînqu'thie, car y'a un rhythme siez toutes les veues - achteu dé couôteunme les veues modèrnes blyînquent pustôt êlectronniquement.
Achteu bein des veues ont 'té r'nonchies car la navigâtion par radar et satellite a rempliaichi les vièrs mèrs.
[amendaer] Fanmeuses veues
- La Veue d'Alexandrie 'tait ieune des Sept Mèrvelles du Monde.
- La veue d'La Corbiéthe en Jèrri est un sŷmbole dé l'Île, dé tchi l'portrait est sus la pièche dé vîngt pénîns et la bille dé chîn louis.
- La veue d'Gatteville en Nouormandie est la pus haute en France.
- La veue d'La Hague fut bâtie 1834-1837
- La veue dé Créac'h en Ouessant est la pus piêssante en Ûrope.
