Hulanda
Di Wikipedia, e ensiklopedia liber
- E artíkulo aki ta skibí na papiamentu. Lo ta apresiá si por mantené e artíkulo aki na estilo di papiamentu.
|
|||||
| Himno: Wilhelmus | |||||
 |
|||||
| Kapital | Amsterdam¹ | ||||
| Stat mas grandi | Amsterdam | ||||
| Idioma(nan) ofisial | Hulandes² | ||||
| Forma di gobernashon
Reina Promé Minister |
Demokrasia parlamentario Monarkia konstitushonal Beatrix Jan Peter Balkenende |
||||
| Independensia • deklará • rekonosí |
26 yüli 1581 30 yanüari 1648 |
||||
| Area - Total - Awa (%) |
41.528 km² (131) 18,41% |
||||
| Populashon - jüli 2006 est. - Densidat |
16.491.461 (59) 397/km² (23) |
||||
| Moneda | Euro (€ EUR) |
||||
| Zona di tempu | CET (UTC+1) | ||||
| TLD di internet | .nl | ||||
| Kódigo pa yama | +31 |
||||
| ¹ E gobièrnu ta situá na Den Haag ² Den Friesland e idioma fries tambe ta un idioma ofisial |
|||||
Hulanda (òf Ulanda) ta un país den Europa ku ta limitá pa e Laman Nort den nort i west di e país, Bélgika den zùit, i Alemania den ost. Hulanda, Antias Hulandes i Aruba huntu ta forma e Reino di Hulanda (Koninkrijk der Nederlanden na hulandes). Hulanda ta un monarkia konstitushonal. Su fronteranan aktual tabata formá na aña 1839.
Hulanda ta un di e paísnan ku densidat di populashon mas grandi na mundu. E ta konosí pa su molinanan, klompen (sapatu di palu), damnan, tùlpnan, baiskelnan i toleransia sosial. Su leinan liberal ta haña hopi atenshon internashonal, manera esnan tokante droga, homoseksualidat, prostitushon i eutanasia. E Korte Internashonal di Hustisia i e Korte Penal Internashonal ta situá na Den Haag.
Kontenido |
[editá] Historia
Bou di Carlos V, Emperador di e Imperio Santu Romano, lider di e Imperio Burgoño i rei di Spaña, e region tabata parti di e Dieshete Provinsianan di Hulanda, ku tambe tabata inkluí gran parti di Bélgika, Luxembourg, i pida di Fransia i Alemania. E Guera di Ochenta Aña entre e provinsianan i Spaña a kuminsa na aña 1568. Den 1579, e parti nort di e Dieshete Provinsianan a deklará su mes independiente i a forma e Union di Utrecht, lokual ta mirá komo e fundashon di Hulanda. Felipe II, yu di Carlos V, no tabata ke laga nan bai i e guera a sigui te ku 1648, aña ku Spaña a rekonosé independensia hulandes.
Despues ku Hulanda a haña su independensia formal di e Imperio spañó bou di Rei Felipe IV, el a bira un di e podernan marino i ekonómiko mas grandi di siglo 17, durante e periodo di e Repúblika Hulandes. Den e era ei, konosí komo e Siglo di Oro Hulandes, kolonianan tabata establesí ront mundu.
Hopi historiadó di ekonomia ta konsiderá Hulanda komo e promé país kapitalista di mundu. Den komienso di e tempu modèrnu di Europa e tabata tin e stat di negoshi mas riku (Amsterdam) i e promé beurs na mundu.
Despues di algun aña bou di Napoleon su Promé Imperio Franses, e Reino di Hulanda tabata formá. Esaki tabata konsistí di Hulanda, Bélgika i Luxembourg. Tambe, e rei di Hulanda tabata Gran Duke di Luxembourg. Bélgika a rebeldiá i a haña independensia na aña 1830. E union personal entre Luxembourg i Hulanda a kibra den 1890 dor di leinan di ascension ku tabata prevení Reina Wilhelmina di bira Gran Dukesa.
Hulanda tabata tin varios kolonia, manera India Hulandes (awor Indonesia) i Sürnam. E 'kolonianan' aki tabata administrá pa e Vereenigde Oostindische Compagnie òf VOC, i e West-Indische Compagnie òf WIC, tur dos tabata kompania privá. Tres siglo despues e kompanianan aki a haña nan mes ku problema finansiero i e teritorionan ku nan tabata tin a kai bou di gobièrnu hulandes (den 1815 i 1791 respektivamente). Ta ei nan a bira kolonia ofisial di Hulanda.
Durante siglo 19, Hulanda no tabata mes lihé den industrialisashon, kompará ku otro país di Europa. Esaki tabata pasombra di su infrastruktura di kanalnan i su dependensia riba poder di bientu. Hulanda a keda neutral durante e Promé Guera Mundial i tabata tin intenshon di hasi esei den e Segundo Guera Mundial. Sinembargo, Alemania bou di e Nazinan a invadí Hulanda den 1940. Lokual a resultá tabata su partisipashon den e aliansa entre Inglatera i Fransia, i su pedido di ayudo. E país tabata derotá rapidamente i despues okupá, maske e inglesnan a tene Zeeland un tempu. Durante e okupashon mas ku 100.000 hudiu hulandes tabata matá den e Holokousto huntu ku hopi hende romani. Grupo 21 di Ehérsito di a forsanan aliá tabata tin e tarea di konduktá operashonnan militario pa liberá Hulanda despues di e Bataya di Normandia. Soldatnan di Inglatera, Canada, Polonia i Merka a kuminsa bringa riba tera hulandes den sèptèmber di 1944, lokual a kaba na e operashon "Market Garden". Awor e Aliadónan tabata tin nan wowo riba Alemania i Hulanda tabata liberá porfin riba 5 di mei 1945 (solamente tres dia promé ku tur forsa aleman a kapitulá). Pasombra di e avansenan di e Aliadónan i e konfiskashon di karga di e alemannan, hulandesnan a sufri òf muri di hamber den e winter di 1944-1945.
Despues di e guera, e ekonomia hulandes a progresá, despues di hopi aña di ta neutral, dor di sera ku paísnan banda di dje. Hulanda a bira miembro di e kooperashon Benelux (di België, Nederland, i Luxembourg). Ahinda mas, Hulanda tabata un di e 12 paísnan ku a funda e Organisashon di Pakto Nort Atlántiko (NAVO na hulandes, NATO na ingles) i un di e seis ku a funda e Komunidat Europeo di Karbon i Stal, ku despues a bira e Union Europeo.
[editá] Polítika
Hulanda tabata un demokrasia parlamentario for di aña 1848 i un monarkia konstitushonal for di 1815. Promé ku esaki e tabata un repúblika di 1581 pa 1806 i un monarkia di 1806 pa 1810 (e tabata parti di Fransia entre 1810 ku 1813). E monarka ta e kabes di estado, kual ta Reina Beatrix. E monarka awe tin solamente un funkshon seremonial, pero e konstitushon ta permití e monarka algun poder, por se kaso e ministernan supordiná nan mes. E monarka su firma ta nesesario pa hasi kualke lei ofisial, i si un konflikto habri entre e i e ministernan, un krisis konstitushonal lo resultá.
Gobièrnunan hulandes tabata konsistí di un koalishon for di siglo 19, pasombra niunka un partido tabata basta grandi pa haña e mayoridat. Formalmente, e monarka ta apuntá e miembronan di gobièrnu. Realmente, manera e resultadonan di e elekshon parlamentario ta konosí, un koalishon ta formá (den un proseso di negoshashonnan lokual a yega di dura shete luna). Despues di esaki e monarka ta apuntá e gobièrnu formá. E kabes di gobièrnu ta e Promé Minister, Minister President na hulandes. E ta un primus inter pares ("promé entre igual") ku normalmente ta e kabes di e partido mas grandi den e koalishon. Algun hende sa debatí kuantu influensia e Reina tin riba e formashon di gobièrnu.
E parlamento ta konsistí di dos "kamber". E 150 miembro di e Tweede Kamer ta eligí kada kuater aña den elekshonnan direkto. E asambleanan provinsial tambe ta eligí direktamente. E miembronan di e asambleanan provinsial ta eligí un tersero di e senado (Eerste Kamer), lokual ta konsiderá menos importante ku e Tweede Kamer. Nan ta kompletamente eligí indirektamente kada seis aña, i por rechasá lei so, dus no por proponé ni kambia lei eksistente. Huntu, e Eerste i Tweede Kamer ta forma e Staten-Generaal.
Dia 7 febrüari, 2006, e Tweede Kamer a introdusí e derecho di inisiativa popular ("volksinitiatief") na un nivel nashonal.
Sientífiko polítiko ta konsiderá Hulanda komo un país ku tin diferensia grandi entre e gruponan sosial pero ahinda ta mantené su mes stabil. Un splikashon ta ku for di Siglo Medio tabata tin e nesesidat pa diferente minoridat kooperá pa yuda bringa e awa. Un mihó teoria ta inkluí un fayo parsial di feodalismo i un rechaso eksitoso di apsolutismo. E sistema di yega na un akuerdo apesar di diferensianan yama e polder model na hulandes. Tambe, Hulanda semper tabata un país di negoshante, dominá pa un burguesia liberal i pa komersio internashonal, hende mester tolerá otro su kultura. Na Hulanda mes, maske calvinismo tabata e religion di estado te ku siglo 19, tabata tin un toleransia pa katóliko i hudiu. Sinembargo, katólikonan no tabata permití di tin funkshon den gobièrnu te ku siglo 19 i tabata tin restrikshon protestant riba tur edifisio katóliko i hudiu. Te ku medio siglo 19, katóliko kasi niunka tabata por a traha misa nobo ku klaramente tabata katóliko. Entre 1839 i 1940 Hulanda a purba di ta neutral banda di mayoria asuntu internashonal i a logra di keda afó di e Promé Guera Mundial (maske esaki a faya den Segundo Guera Mundial). Lokual a resultá ta un reputashon kordial den otro país, un asina bon ku hende ku pasaporte hulandes tin kasi ningun problema pa drenta otro país, pa bishitá òf hasta emigrá.
Sinembargo, den e promé añanan di siglo 21 tabata tin un kambio den polítika hulandes, kual partidonan links ta birando mas grandi ku partidonan drechi. Un ehèmpel di esaki ta e kaso di LPF. Pim Fortuyn, fundadó di e partido, a tene kabinètnan anterior responsabel pa e fayonan den e integrashon di imigrantenan.
Na kabes di e gobièrnu aktual ta e kabinèt Balkenende III, un kontinuashon kortiku di Balkenende II (CDA/VVD/D66) sin e partido mas chikitu di e koalishon, D66. Elekshon ta planiá pa 22 novèmber, 2006.
Balkenende II su pólisanan di reformashon ekonomiko i imigrashon no tabata masha popular, lokual a resulta na mas apoyo pa e oposishon. Den e elekshonnan munisipal di 2006, e koalishon a perde hopi na e otro partidonan, manera e partido laboral (PvdA) i e partido sosialistiko (SP). E desishonnan kontroversial di minister Verdonk tokante e estado legal di polítiko Ayaan Hirsi Ali, e gobièrnu hulandes a kai den krisis riba 29 jüni, 2006. Jan-Peter Balkenende a presentá su kabinèt temporal na e Reina riba 7 jüli.
Riba 1 jüni, 2005, 61,6% di votadónan a disidí den un referendum kontra un konstitushon pa e Union Europeo, tres dia despues ku Fransia a vota kontra.
[editá] Futuro
[editá] Divishon Administrativo
[editá] Geografia
[editá] Ekonomia
[editá] Demografia
[editá] Idiomanan
[editá] Religion
[editá] Kultura
[editá] Arte
[editá] Linknan eksterno
- [1] - Portal ofisial di gobièrnu di Hulanda
