Die Dolpehock Saenger Chor
From Wikipedia
Die Dolpehock Saenger Chor hot ihre Schtaert grickt baut die naemlich Zeit, ass die Pennsylvaanisch-Deitsch Versammling vun Weschtlich Barricks Kaundi g‘schtaert iss warre - in 1980 an‘re Meeting in Baron Stiegel‘s Charming Forge Mansion. Die Mannsleit vum Raad henn sich g‘sammelt um die Glapperbax, un die Edith Reifsnyder hot g‘schpielt. Sie henn aag‘fange, deitsche Schticker singe fer die Erscht Versammling. Datt henn sie g‘sunge in en Drupp. Noh henn sie etliche Weibsleit un noch paar Mannsleit dazu genumme, un uff der 20. Matz 1981 waar der Aafang vun der Dolpehock Saenger Chor. Die Leit singe im pennsylvaanisch-deitsche Dialect, des iss ihr Weg fer die deitsch Schprooch behiede un aa, die deitsch Kultur un Arebschaft am geh halte. Sie henn schiergaar 600 Singschticker in ihr'm Buch. Deel sinn grischtlich, deel sinn Folkschticker, un annere sinn Feierdaags, patriodische un weltliche Schticker. Iwwer 200 vun denne hot die Helene Lutz iwwersetzt odder g‘schriwwe.
Die Glieder kumme vun Weschtlich Barricks Kaundi un Oschtlich Lebanon Kaundi. Die Weibsleit sinn aageduh in weisse Lause un schwatze Schteck, die Mannsleit henn weisse Hemmer un schwatze Reck un Hosse un en schwatzer Schlupp — un alliebber hot en roti Rose aa. Die Glieder an des Zeit sinn: Edith Reifsnyder (Vorschteher un Glapperbax Schpieler), Mabel Bickel, Mary Degler, Margaret Engle, Joyce Hassler, Marianne Kline, Kathryn Koch, Stella Labe, Helene Lutz, Marie Steinmetz, Rachel Stump, Lloyd Engle, Richard Hassler, Francis Kline, Robert Koch, Chester Lance, William Lutz, John Messner un der Vernon Reifsnyder.
Vum Schtaert henn sie performed an Retirement Heemete, bei Senior Citizen Leit un in pennsylvaanisch-deitsche Gottesdienscht, Versammlinge, Familie Reunions, Hochziche, Yaahresdaage, bei Picnics, Leichte un in Shopping Malls. Sitter Hanning 1982, uff der erscht Freidaag im Munet, hot der Chor g‘sunge uff der Pennsylvaanisch-Deitsch Schtund uff Barricks Community Television (BCTV) in Reading (PA).
Der Saenger Chor war schtolz un froh fer helfe in viel Gemeinschaftdinger so wie die Yaahrlich Pennsylvanisch-Deitsch G‘sellschaft Conferences an Millersville un Kutztown, Zammekummes im Landis Valley Farm Museum, beim Kutztown, Schaefferschteddel un Goschenhoppen Volkfescht un etliche annere Gelegeheite meh.
En Video Cassette un Manuscript mit die History vun der Dolpehock Saenger Chor iss in die Library vun Congress Records in Washington, DC. ´S Program watt als zugemacht mit‘m Weise vun die pennsylvaanisch-deitsch Fahne un ‘em Singe vun die letschte Wadde: „Liewer Gott im Himmel drin, loss uns Deitsche, was mer sinn, un erhalt uns alle Zeit, unser deitsche Frehlichkeit. Un saage all mitnanner, weil mir all do beinanner schtehn, eb mir nau ganz ausnanner gehen, verschprech zu halde in grooss Ehr hoch, die liebe, die siesse Mudderschprooch."
Vun 1988 bis 2001 hot der Saenger Chor en Schpiel gewwe an die Versammling vun Weschtlich Barricks Kaundi mit Music un alle Saenger Chor Glied. Es meenscht vun die Schpiele waare g‘schriwwe bei die Helene Lutz un die Stella Matthew. Alsemol hot der Chor Schpiele gewwe am Haage Wattshaus an Shartlesville odder am St. Daniel‘s Karich (Die Eck Karich) neegscht an Robesonia.
