Wikipedia:Spellin an grammar
Frae Wikipedia
Table o contents |
[edit] Spellin
Here at Wikipaedia it's recommendit that fowk uises "tradeetional" pan-dialect spellins. Awtho thir isna sae strict as in English we ettle tae come up wi writin that's easy tae read an can be soondit bi readers in thair ain dialect. Ae thing tae mynd is that maist fowk that kens better disna uise the apologetic apostrophe onymair. Mair oot ower evyte slang in an encyclopaedia.
O coorse maist awbody haesna been teached siclike at the schuil but wi practice it shoudna be ower deeficult. A wheen resoorces is aboot that expounds on whit "tradeetional" spellins is an hou tae applee thaim in a conseestant mainer.
We ettle tae follae the wey set oot bi the Report an Recommends o the Scots Spellin Comatee, itherwise kent as the RRSSC.
Fowk that writes airticles but disna hae the Scots can eik the {{fixscots}} template or the {{Translation}} template.
Ither guides tae spellin:
- A cutty guide tae the maist kenspeckle pynts o Scots spellin can be fund in the Wikipaedia airticle anent the Scots leid.
- Jottins on Spellin an grammar fae Scottish Language Dictionaries Ltd.
- Descreeption o spellin an pronunciation athort sindry dialects fae Scots-Online.
- The ScotsGate Scots Grammar haes jottins on spellin inby.
- The innin tae the SND gies a bit grundin in the leid an the tradeetional written forms. Mynd whit's uised in Wikipaedia is redd up for tae be mair conseestent.
- John Tait's thochts anent the maiter.
- David Purves' thochts anent the maiter (PDF) a development o thir o the SLS.
- The 1947 Scots Style Sheet.
- Aw Ae Wey - Written Scots in Scotland and Ulster (PDF 1.43 MB). An interestin descreeption o Scots orthography tae modren times.
[edit] Grammar
Scots isna juist English written wi orra wirds an spellins. It haes its ain grammar an aw. If aw ye dae is tak an English text an chynge the spellins an swap a puckle wirds it'll juist be Scotched English an no Scots.
- A cutty guide tae the maist kenspeckle pynts o Scots grammar can be fund in the Wikipaedia airticle anent the Scots leid.
- Jottins on grammar fae Scottish Language Dictionaries Ltd.
- Ye can dounlaid the PDF o the ScotsGate Scots Grammar.
- A weel wrocht descreeption fae Scots-Online in HTML or PDF
- The entries in the Scottish National Dictionary (SND) (see Dictionars ablo) gies guidance anent the richt semantic an gramatical uiss o wirds.
[edit] Dictionars
- Prent dictionars can be gotten frae SLD Ltd.
- The Online version o the Scottish National Dictionary (SND) is the mither o aw dictionars. Mynd it's Modren Scots uised in Wikipaedia sae wale SND and SND Supll. Gin ye wale Full Entry the dictionar rake micht come oot wi a better ootcome whaur ye can wale the wird ye micht be efter fae the list on the left.
- Scots-English-Scots fae The Online Scots Dictionary. Spellins here seems tae hae been redd up for conseestency but the defineetions is aften awfu cutty sae cross referencin the SND wad be wirth a thocht gin ye're no richt shuir o the richt uiss o a wird.
- Wikipedia:RRSSC Common wordleet (English ti Scots)
- Wikipedia:RRSSC Common wordleet (Scots til English)
- Wikipedia:Scots-English-Scots dictionar
[edit] Exemplars
For a guid exemplar o modren Scots spellin an grammar, read William Lorimer's New Testament in Scots (Canongate Classics, Edinburgh 2001. ISBN 1841951447).
A guid exemplar o contemprar Scots writin online is Scots Tung an thair monthly wittins blad Scots Tung Wittins.
A guid walin o tradeetional Scots leeteratur can be fund at ScotsText.
For a guid examplar o whit no tae dae see this meaninless, menseless mince wi heich seembolic vailyie but o nae uiss whitsomeiver for Scots-speakin fowk.
[edit] Raesons for this policie
The main raeson is for ti dae awa wi arguments ower the richt spellins o words. That wastes time better spent writin new text for airticles. Ti settle on the ae wey o spellin we needit to wale a staundard. Monie staundards haes bin proponed ower the years an we hae taen the hindmaist ane, the RRSSC, sin it is the hindmaist.
The RRSSC haes bin pit thegither by fowk that ken the work they're daein for the maist pairt. It's nae perfick an there's a twa-three pynts that ae body or anither disna like. Houaniver gin Scots prose is ti gang onywey in Scots eddication, prose writers maun rally roond ae staundart. Maist o the fowk writin for the Scots Wikipaedia haes chuisen tae rally roond this ane till a better comes alang.
Twa ither policies micht hae been waled but they baith haev waur fauts than the RRSSC.
"Oniething gaes" haes bin tried on the English Wikipedia whaur American/English spellins are baith allooed. It leads tae pyntless argument in the lang run (an mibbies e'en in the short run). Forbye it micht lead tae accusations o Doric bias or Lallans bias at some pynt. Anither pynt is that we maun hae uniform spellin gin we want ti be a richt encyclopaedia.
"A seistem o wir ain" is ower muckle wark. Oor aim is tae write an encyclopaedia an that's a muckle job in its ain richt. The RRSSC has awready duin a deal o wark on spellin an there's little need for us ti dae the wark ower again. It's better that we juist uise whit they've duin. Oor aim shuid be tae mak a wheen o encyclopaedia airticles wi as little distraction as we dow -- nae ti mak yet anither Scots spellin seistem.
That said, there's nae doot that fowk winna write the RRSSC wey whan they contreibute. It's nae easy whan ye daena ken it. Nane o us wis taucht Scots spellin, sae we canna be expeckit ti get it richt. We shuid tak text spelt onywey athoot compleenin or rushin ti fix it richt awa. Houaniver awbody shuid mynd that we aim ti correct spellins ti the RRSSC standard suiner or later.
[edit] Collogue
For tae quaisten or mak pynts aboot the maiters abuin uise the Collogue page (Ye can sneck the collogue tag abuin an aw).
Guidance anent mair general maiters can be fund bi gaun throu the Commonty Yett.
Technical maiters is dealt wi at the Mercat Cross.
