翁美玲
来自 吴语维基百科
| 翁美玲 | |
|---|---|
 勒拉TVB版武打片“射雕英雄传”里向扮演“黄蓉”
|
|
| 出生 | 1959年5月7号 香港九龙 |
| 过辈 | 1985年5月15号 香港九龙 |
翁美玲 (1959年5月7号 – 1985年5月14号)是香港80年代初辰光个当红电视女星。俚廿六岁过辈个辰光，齐巧是俚事业个高峰。翁美玲出生勒许香港一个赅钞票个行政官员家庭，是屋里向个独养囡儿。俚个童年相对来讲呒拨啥波折，一脚到7岁辰光俚个爹爹过辈。
内容 |
[编辑] 教育经历
翁美玲勒拉15岁个辰光远开香港到英国，搭俚笃娘搭仔晚爷一道生活。俚笃娘是勒拉两年前头移民到英国个。翁美玲勒拉香港个辰光上个是玫瑰园学堂(位于香港Stubbs路)，勒搭俚完成俚个小学搭仔一部分中级教育。俚勒拉剑桥个一只中学里向继续中级教育个学习，通过着通用教育证书（GCE）个普通水准考试（GCE O-Level）。完成仔普通水准考试之后，俚参加着一只由剑桥大学举办个2年头基金项目。该个项目完成仔，俚咦到伦敦交关有名个艺术搭仔设计中央学院里向去学纺织品设计，勒拉该所艺术学堂里向登着4年。
[编辑] 初出茅庐
1982年，翁美玲回到香港，並参加香港小姐选美比赛，获得第9名。选美比赛之后，俚拿着香港无线电视台(TVB)个演员合同。1982年俚头一趟演出，是勒拉一部叫十三妹 个广东言话连续剧里向。搿部片子讲个是清朝辰光个事体，一道主演个还有汤镇业搭仔任达华，勒里向翁美玲演个是一个万人迷个满洲公主香格格。就是该部连续剧拿俚推到公众个眼睛光里向。虽然讲翁美玲勒拉该部电视剧里向演个相对是一个小角色，尚况里搿趟个表演叫TVB放心让俚去主演另外一部连续剧《射雕英雄传》，也就是归部让俚勒80年代个香港、马来西亚、新加坡、泰国搭仔越南家喻户晓个片子。一脚到今朝，俚还是广受欢迎，就因为俚勒《射雕》里向主演个活泼鲜跳个角色“黄蓉”。
[编辑] 声名鹊起
翁美玲演个顶顶有名个武侠电视连续剧就是“射雕英雄传”，勒里向俚主演一只叫黄蓉个角色。TVB勒拉19世纪80年代个辰光拍着弗少从金庸（查良镛）个著名武侠小说改编过来个武打片。金庸个《射雕英雄传》拨改编成功过交关多电视剧搭仔电影，必过呒拨哪里一个版本有1983年TVB版介受欢迎。黄日华演个郭靖，单纯天真；翁美玲演个黄蓉呐，冰雪聪明，俚笃搿个一对一脚到今朝原是香港武打片有史以来顶让人眼热个荧屏鸳鸯之一。勒拉该个系列里向个角色也让别家头像苗侨伟，杨盼盼，谢贤搭仔李司棋咾啥初露头角。
[编辑] 香消玉殒
俚个墓志铭是实梗写法个:
先到上帝归搭去寻倷
呒拨倷勒屋里倪孤单
倪个生活真个两样哉
处处侪会是天堂
只要倷好再转来
1985年5月14号早浪向，翁美玲勒拉俚九龙公寓里向拨人发现煤气中毒、神志弗省。照俚个做男演员个朋友邹世龙（另有传闻讲邹归个辰光已经开始追求俚）个讲法，翁美玲勒拉1985年5月13号个夜头打过俚电话。邹证实讲，翁为仔搭汤镇业个关系冷淡觉着殟塞。电话挂脱仔，邹还是交关担心俚，就跑到俚个公寓想去望望俚，但必过朆进得进去。俚当仔呒拨人勒拉屋里向，个末就咦转去哉。邹勒拉1985年5月14号早起头咦跑到俚公寓去敲俚个门，呒拨人开门。邹讲，俚闻见门缝里漏出来个煤气味道，就翻过公寓山墙爬到公寓个两层楼浪。俚拿公寓前窗盘开出来，跳窗进到公寓里向，发现翁美玲睏勒起居室个地板浪人事弗省。邹遂先就拿大楼个保安搭仔警察喊过去，拿翁美玲送到近段个九龙浸会医院里向。送到医院个辰光，医生就宣布俚已经死亡哉。
关于俚个死因，有交关多谣言。有人认为是事故，也有人认为是自杀甚至他杀。一种传得交关广个说法是，因为俚搭TVB男演员汤镇业关系作兴要破裂，殟塞难过导致俚自杀（有人注意着，1985年3月14号，俚接受香港一家电台采访辰光，拨问起俚搭仔汤镇业个绯闻，俚解释讲汤镇业只弗过是一个普通朋友搭仔俚敬重个同事。）拿俚个死搭仔俚搭汤镇业个关系联系起来个讲法，勒拉交关程度浪是因为邹世龙讲个俚压末24个钟头个情况。也有谣言讲邹世龙是翁个男朋友。根据翁个TVB同事讲，事故之前个几日翁个行为举止搭平常辰光呒拨啥两样，看弗出俚难过殟塞或者有自杀个倾向。翁勒拉1985年3月14号搭仔过辈前头两个礼拜个广播采访里向听起来对俚自家个前途也相当乐观。俚也朆留下自杀遗言。
翁美玲个葬礼是桩大事体，有成千上万俚个影迷搭仔交关香港名人参加。俚个遗体放置勒拉九龙红磡个世界殡仪馆，让俚个影迷献上俚笃最后个敬意。俚个朋友搭仔电视剧个合演同事，像苗侨伟, 黄日华, 梁朝伟, 刘德华等帮俚扶灵。俚个葬礼是天主教葬礼。1985年5月19号俚勒拉香港火化，骨灰拨安放勒拉英国个剑桥。
[编辑] 表演作品
- 十三妹，1983年1月
- 射雕英雄传 连续剧，1983年2月
- 夹心人，1983年11月
- 决战玄武门，1983年11月
- 天师执位, 1984年2月至同年3月
- 生锈桥王, 1984年4月至同年5月(?)
- 楚留香之蝙蝠传奇，1984年11月
- 挑战, 1985年4月
- 楚河汉界, 1985年4月
[编辑] 外部链接
[编辑] 影迷网站
- 汤镇业接受简短采访。翁美玲拨提及。
- http://www.barbarayung.net
- http://www.yungmeiling.com
- http://www.miuyungforever.com
- http://www.wengmeiling.com
- http://post.baidu.com/f?kw=%CE%CC%C3%C0%C1%E1
- http://www.aweng.com
- http://lunwang.com/wml/
[编辑] 视频网站
- Opening Title from “射雕英雄传”
- Opening Title from “十三妹”
- Opening Title from “生锈桥王”
- Opening Title from “楚留香之蝙蝠传奇”
- TVB K-100采访最后日脚里向个翁美玲
- 1996 TVB Broadcast采访最后日脚里个翁美玲
- 翁美玲搭仔黄日华演唱“射雕”主题曲
- 1983版“射雕”制作过程当中个几个场景
- 勒“楚留香之蝙蝠传奇”里向凸显翁美玲搭仔苗侨伟个几只镜头
Categories: 翻译请求 | 演员
