日本地理
出自維基百科，自由嘅百科全書
日本係東亞島國，由四個大島同埋6852個島仔組成，2005年佢全部面積有成377 915km²[1]。四大島由北到南分別係北海道、本州、四國同埋九州，呢幾個地域叫做「日本本土」而唔會另喺後面加個「島」字。四大島之中，本州係最大份，比其他三個大島加埋重要多。
日本有效管轄範圍介乎北緯20°25′到45°31′[2]、東經122°56′到153°59′之間，喺正中國大陸嘅東北偏北、朝鮮半島以東、西伯利亞以南，所處時區快協調世界時9粒鐘。
用地殼板塊來講，日本列島係由歐亞大陸板塊同其他板塊撞到突起而成，國土約莫75%係山地丘陵地帶。本州中間山脈連綿，將國土分成兩份，分別係向住日本海嘅「裏日本」同埋向住太平洋嘅「表日本」[3]。日本平原就多數喺沿岸地區，係日本人口、都市、經濟命脈嘅集中之地。日本列島嘅地殼唔穩定，居民周不時要防範火山爆發同地震。不過，火山活動亦都帶來溫泉，係日本人同遊客至愛。丘陵地形整到日本河流偏短、流域細、落差大[4]。
日本周邊嘅海域分別係東邊嘅太平洋、南邊嘅菲律賓海（日本通常視作太平洋一部分）、西邊嘅東海、西北邊嘅日本海，以及東北邊嘅鄂霍次克海。本州同四國之間嘅海叫做瀨戶內海，入面散佈好多島。日本對出太平洋海域，有股叫黑潮嘅暖海流向北行，另外有股親潮寒流就響北太平洋向南流。親潮帶住好多浮游生物，因為咁，東北地方海域有好多漁產[3]，漁業好發達。
由於日本橫跨嘅緯度都幾大，南北氣溫嘅差得好明顯。北海道同本州嘅高原地帶係亞寒帶，本土地區就屬於溫帶，而沖繩等南方諸島就屬於亞熱帶[4]。此外，因為有季候風同埋海流交匯，所以日本四季分明、降水充足。5月至9月，熱帶氣流會從太平洋靠向日本，加上黑潮、親潮喺周邊海域交匯，為日本帶嚟悶熱、雨水充足嘅夏季。標誌住夏天開始嘅「梅雨」雨季，就南部起向北部走。日本喺夏季亦都會有唔少颱風，造成傷亡破壞。到咗冬天，西伯利亞大陸嘅冷空氣集結成高氣壓，趨向太平洋北部嘅低氣壓，結果導致寒風從西面吹向日本。咁就會為面向日本海嘅「裏日本」帶嚟嚴寒同暴雪，「表日本」就冬日晴朗[3]。以上種種，都導致日本雨量同差唔多緯度嘅朝鮮半島、華北等地區差異顯著。
目錄 |
[編輯] 位置同面積
日本位於歐亞大陸以東、太平洋西部，由幾千個島組成，串埋成條弓咁，所以叫列島。日本國土畀海包實，並冇同任何大陸相連。西面嘅日本海對岸就係俄羅斯、北韓同南韓，西南面嘅東海就面向中國大陸同台灣島，南面面向菲律賓海嘅美屬北馬里亞納群島。
根據日本國土交通省國土地理院資料：[5]
- 最東點：東京都 南鳥島，北緯24°16′59〞，東經153°59′11〞
- 最西點：沖繩縣 與那國島，北緯24°26′01〞，東經122°56′01〞
- 最南點：東京都 沖之鳥島，北緯20°25′31〞，東經136°04′11〞
- 最北點：
根據日本總務省統計局及統計研修所嘅《2007年統計年鑑》，日本喺2005年：[1]
- 領土面積：377,915 km²
- 海岸線總長：33,889 km
- 日本本土海岸線長度：19,240 km
根據《聯合國海洋法公約》：[6]
- 領海：領海基線起12海里（第3條），不過喺北海道宗谷海峽、北海道同本州之間嘅津輕海峽、九州以西嘅對馬海峽西、東水道，以及九州以南嘅大隅海峽，就劃做5個「特定海域」，領海以基線起3海里為界。[7]
- 專屬經濟區：離領海寬度基線200海里（第57條），但係就同大韓民國同中華人民共和國有爭議，而家重商討緊。
[編輯] 行政地理
- 主文： 都道府縣
日本整體可以劃做八大地方，分別係北海道、東北地方、關東地方、中部地方、近畿地方（又叫關西地方）、中國地方、四國地方同九州地方。呢啲地域係古代分野而來，家下係冇官方行政地位嘅。不過民間一直向呢個分法，重用得好廣泛，例如地理書分冊、交通安排、民間習慣、商業機構等等咁。
日本政府自1947年起，就跟《地方自治法》將全國分成47個一級行政區，叫做「都道府縣」，分別係一都（東京都）、一道（北海道）、二府（大阪府、京都府）、四十三縣。[8]
都道府縣下面呢，就叫做「基礎地方公共團體」，分別係市、町、村。市嘅人口同工業化規模大過町，而都道府縣要設置町亦都有一定人口同工業化嘅要求，至於村就冇限。市、町、村都直接隸屬都道府縣，地位平等，冇互相隸屬或者領導關係。
1956年起，都道府縣嘅市可以設置政令指定都市。政令指定都市人口超過50萬，喺經濟同工業運作上好重要。政令指定都市雖然隸屬道、府、縣嘅管轄，但係部分行政事務就改為接受中央政府直接指導，亦都享有更高嘅自治權同財政來源。政令指定都市入面可以設置區，方便自治行政。2007年4月1日起，全國政令指定都市增加到17個。
1996年起，都道府縣嘅市可以設置中核市。中核市人口必須達30萬，比一般嘅市擁有更高自治權力，但就唔及政令指定都市。截至2006年，全國中核市有37個。
2000年起，都道府縣嘅市可以設置特例市。特例市人口必須達20萬，比一般嘅市擁有更高自治權力，但就唔及中核市。截至2006年，全國特例市有39個。
東京都係冇設置任何政令指定都市、中核市或者特例市嘅。東京東部、瀕臨東京灣人口最密集嘅地域劃咗做23個特別區。特別區雖然同其他市、町、村一樣，都係具有自治權嘅地方公共團體，而且各區人口亦都差唔多將近政令指定都市，但水喉水、坑渠水、消防等等嘅公共服務就唔會自己處理，畀返東京都政府搞。
日本過去曾經有過叫做郡嘅地方行政機關，階級係都道府縣以下，町村以上。1920年代起，郡制已經廢除，而家只係用作概括描述行政區域或者寫地址用，並冇實際嘅行政用途。
另外，部分都道府縣會喺市町村上設置支廳。支廳唔係地方公共團體，冇自治權，地址亦唔會寫。支廳只係用於幫都道府縣政府喺偏遠或者離島地區搞行政。都道府縣之中，北海道面積最大，國內大部分嘅支廳都集中喺度。納入東京都管轄嘅多個太平洋離島亦都設有支廳。
[編輯] 人口
- 主文： 日本人口
根據日本《2007年統計年鑑》，2005年全國人口共1億2,775萬7,000人，男性佔48.8%，女性佔51.2%，五年增長率0.7%[9]，總人口係世界前10名以內。
日本平地少山多，大部分人口集中喺一綫沿海平原上面。日本三大都市圈（東京圈、名古屋圈、大阪圈）嘅人口更係全國49.7%[10]。當中東京都2005年人口有成1,257萬人，人口密度為每平方公里5,748人。計埋鄰近7個縣，首都圈人口有成4,237萬人[11]。另一邊廂，面積最大嘅北海道人口就只係得563萬人，密度每平方公里72人，可以睇到各都道府縣人口係好唔均勻。
日本嘅人口結構係政府隱憂。日本男性人均壽命78.64歲，女性85.59歲，數字係世界第一[12]。咁樣雖然反映到生活質素同醫學嘅進步，但亦都反映人口老化問題越嚟越嚴重。第二次世界大戰過後，1940年代末期出現嬰兒潮，呢啲細路喺20世紀成為日本龐大嘅勞動人口，推動經濟發展。佢哋又喺1970年代生育下一代，造成另一波嬰兒潮。但隨住時代轉變，日本出生率慢慢跌。1947年正值嬰兒潮高峰，自然增長率19.7。1970年代自然增長率最高亦都有1972同73年嘅12.8。但到咗2003年，自然增長率首次跌穿1，2004年自然增長率僅僅得0.7[9]。現代日本人口面對「老齡化」同「少子化」（每戶生育孩子數量下降）問題，加上首波嬰兒潮人士開始退休，造成經濟同社會嘅危機[13]。
[編輯] 地勢
日本列島係北美洲板塊、太平洋板塊同埋菲律賓板塊撞入歐亞大陸板塊，歐亞大陸皮塊突起而成。由於地殼活動唔穩定，地震認真密，有啲火山重會耐唔耐爆發，海域發生地震又會引發海嘯，居民成日都要小心防範。火山活動亦都帶來溫泉。
日本國土大概75%係山地丘陵地帶，小規模嘅山間盆地同平原散佈全國，成為民居、耕種、經濟活動集中地。山脈連綿本土中央，將國土分成兩半，成為面向太平洋嘅「表日本」同日本海嘅「裏日本」。表日本山坡好斜，高度有成3,000米，河谷山峽好深。日本中部長野縣附近係三組山脈匯聚嘅地方，由北至南分別係飛驒山脈、木曾山脈及赤石山脈，統稱日本阿爾卑斯山脈。部分山頭重有成海拔三千幾米高，當中最高點係赤石山脈嘅北嶽，有3,193米高。全國最高峰就係位於太平洋沿岸山梨縣同靜岡縣交界嘅富士山，自1707年成為睡火山，高度係海拔3,776米。裏日本方面就有高原同埋比較矮嘅山峰，高度約為海拔500至1,500米。
日本國內平原面積唔大，當中最大嘅係首都東京所喺嘅關東平原，面積約13,000km²。其他較有規模嘅平原，包括圍繞愛知縣名古屋嘅濃尾平野、大阪同京都兩府附近嘅近畿平原、本州東北部宮城縣嘅仙台平原，以及北海道西部嘅石狩平原。唔少平原都係鄰近沿岸地區，面積通過開山填海而有所增加。[3]
根據日本國土交通省國土地理院山嶽標高資料：[5]
- 全國最高點：山梨縣及靜岡縣交界 富士山，海拔3,776m，北緯35°21′39〞，東經138°43′39〞
根據日本總務省統計局及統計研修所嘅《2007年統計年鑑》：[1]
- 最長嘅河： 信濃川，367 km
- 流域面積最廣嘅河：利根川，16,840 km²
根據日本國土交通省河川局湖沼資料：[14]
根據日本國土交通省2004年嘅《關於土地動向報告》：[15]
| 森林 | 農地 | 住宅地 | 水面 | 道路 | 荒地 | 其他 |
|---|---|---|---|---|---|---|
| 66.4% | 12.8% | 4.8% | 3.6% | 3.4% | 0.7% | 8.3% |
根據日本總務省統計局及統計研修所嘅《2007年統計年鑑》提供2004年嘅數據，日本私有土地佔162,302 km²，其中：[1]
| 可作住宅用地 | 稻田 | 其他田地 | 森林 | 牧場 | 荒地 | 雜用 |
|---|---|---|---|---|---|---|
| 15,961 km² | 27,080 km² | 24,885 km² | 78,674 km² | 1,331 km² | 8,597 km² | 5,522 km² |
[編輯] 海
日本周邊海域分別係東邊嘅太平洋、南邊嘅菲律賓海（日本多數將佢當作太平洋一部分）、西邊嘅東海、西北邊嘅日本海，以及東北邊嘅鄂霍次克海。本州與四國之間嘅海稱為瀨戶內海，當中散佈多個海島。
日本嘅太平洋海域有叫做黑潮嘅暖流由南向東北流動，而佢嘅支流對馬海流就會經過對馬海峽，流入朝鮮半島同日本之間嘅日本海。另一股稱為親潮嘅寒流就從北太平洋向南方流動。叫做利曼海流嘅親潮支流，就經韃靼海峽流入日本海[16]。親潮帶嚟充分嘅浮游生物，令東北地方海域漁藏豐富[3]。
[編輯] 氣候
- 主文： 日本氣候
日本全國橫跨嘅緯度有成25°，南北氣溫差異十分顯著。北海道同本州嘅高原地帶屬亞寒帶，本土地區屬溫帶，而沖繩等南方諸島就係亞熱帶[4]。此外，位置令佢受到季候風及海流交匯所影響，因此四季分明、降水充沛。
11月底左右，西伯利亞大陸嘅冷空氣集結成高氣壓，趨向太平洋北部嘅低氣壓。西北風吹過日本海上空嘅濕氣，結果為面向日本海嘅「裏日本」帶嚟嚴寒同暴雪。當中尤以北陸地方（富山縣、新潟縣一帶）嘅山間積雪最深厚。喺山脊另一邊嘅「表日本」，風雪由於受到山脊阻擋，日本東部嘅冬日天氣通常晴朗，但氣溫仍然偏低[3] [17]。
冬季完咗之後，春天開始，3月下旬日本各地嘅櫻花及梅花相繼綻放，民眾紛紛舉行一年一度嘅賞花活動。
5月至9月，太平洋上空嘅熱帶高壓氣流趨向日本，遇着鄂霍次克海同日本海嘅冷空氣。加上黑潮、親潮喺周邊海域交匯，為日本帶嚟翳焗、多雨嘅夏天。標誌住夏天開始嘅「梅雨」雨季從南部開始向北部展開，呢道降雨前鋒叫做「梅雨前線」。直到7月，太平洋季候風將暖濕氣流佔據日本上空，雨季結束、夏天就嚟到嘞。夏天同秋天之間，係日本嘅颱風季節，每年三、四個登陸嘅颱風會造成傷亡破壞。[17]
[編輯] 天然資源
日本係天然資源短缺嘅國家，工業發展所倚賴嘅石油、天然氣、金屬等大部分都係由外國進口嘅。
日本對石油嘅需求係每日541萬桶，進口量達99.7%；天然氣每年843億立方米，進口佔96.3%；每年122萬噸銅就全部都係進口貨；每年60萬噸鋅則佔93.2%。1973年至2003年間，日本喺能源來源對石油嘅依賴已經大幅減少，取而代之嘅係天然氣同原子能。
金屬資源方面，日本對金屬資源需求極殷，2005年日本對銅嘅需求量佔全球總需求量嘅7.4%，鎳更佔14.1%，鉬嘅15.4%。日本生產銅嘅數量曾經佔世界第一，但現今同其他金屬資源都已經採掘到冇晒，所以都係要依靠進口。[18]
農業方面，日本適合耕種嘅土地面積細，生產成本高，日常農產品好依賴外國進口。日本1994年加入世界貿易組織後，喺協定框架內繼續嚴格限制進口農產品質同數量，例如進口大米就控制喺市場佔有率5%以內，並且嚴格檢疫。另一方面，政府大額補貼國內農業嘅基礎建設、技術、公共服務等。結果，日本農產品嘅品牌形象以優質為主，即使價格偏高, 國民亦都愛護同信賴。日本政府嘅農業政策，不但只確保國內糧食穩定供應，亦都推動咗日本農業現代化、農民收入穩定[19] [20]。
[編輯] 相關文章
- 自然地理：日本平原、日本山峰、日本河流、日本島嶼、日本湖泊
- 人文地理：日本人口、日本農業、日本工業、日本經濟、日本旅遊業
- 行政地理：日本地域、都道府縣、日本交通
[編輯] 資料來源
- ↑ 1.0 1.1 1.2 1.3 海岸線超過0.1千米至算「島」。參考日本總務省統計局、統計研修所：〈國土、氣象〉，載《2007年統計年鑑》，2007年2月13日睇過。
- ↑ 如果計埋同俄羅斯嘅南千島群島有主權爭議領土擇捉島，最北會去到45°33′。
- ↑ 3.0 3.1 3.2 3.3 3.4 3.5 Long, S. O.（1994年）：〈社會及自然環境〉，摘自美國國會圖書館國家研究系列《日本》。
- ↑ 4.0 4.1 4.2 廈門大學日本研究所（2006年）：〈日本的地形地貌〉，載《走進日本》，2007年2月16日睇過。
- ↑ 5.0 5.1 日本國土交通省國土地理院：〈都道府県の東西南北端點と重心の経度緯度〉，載《地理に関する情報》，2007年2月16日存取。
- ↑ 1982年12月10日簽訂嘅《聯合國海洋法公約》第Ⅴ部分〈專屬經濟區〉
- ↑ 日本海上保安廳海洋情報部（2004年）：〈特定海域〉，載《日本の領海》，2007年2月16日存取。
- ↑ 廈門大學日本研究所（2006年）：〈日本的行政區劃 〉，載《走進日本》，2007年2月17日睇過。
- ↑ 9.0 9.1 日本總務省統計局、統計研修所：〈人口、世帶〉，載《2007年統計年鑑》，2007年2月20日睇過。
- ↑ 日本總務省：〈住民基本台帳に基づく人口・人口動態及び世帯數〉報導資料，2006年7月27日。
- ↑ 東京首都圈包括：東京都、神奈川縣、千葉縣、埼玉縣、茨城縣、栃木縣、群馬縣及山梨縣。見日本國土交通省（2006年）：《平成18年首都圈白書》，2007年2月20日睇過。
- ↑ 日本厚生勞動省：〈平均壽命嘅國際比較〉，載《日本人嘅平均壽命》2004年數據。2007年2月20日睇過。
- ↑ 廈門大學日本研究所（2006年）：〈日本社會〉，載《了解日本》，2007年2月20日睇過。
- ↑ 日本國土交通省河川局：〈日本の主な湖沼〉，2007年2月17日存取。
- ↑ 呢份報告所用嘅數據喺2004年更新，當時國土總面積係377,900km²，同上文所提及《2007年統計年鑑》資料未盡相同。日本國土交通省土地綜合情報圖書館：《平成16年土地の動向に関する年次報告》第2章〈土地に関する動向〉，存取於2007年2月17日。
- ↑ 周天華：〈日本海〉條目，載《中國大百科全書智慧藏》，2007年2月16日存取。
- ↑ 17.0 17.1 〈地理和氣候〉，載《日本縱覽》，出自日本外務省委託運營網站web-japan.org，2007年2月10日存取。
- ↑ 日本經濟產業省 石油天然氣、金屬礦物資源機構：〈日本の資源事情〉，2007年2月20日存取。
- ↑ 曹鵬程：〈日本保護農業嘅現狀與未嚟〉，載中國《人民日報》 2004年5月11日第七版。
- ↑ 韓喜平、李二柱（2005年）：〈日本農業保護政策嘅演變及啟示〉，載《現代日本經濟》2005年04期，吉林省：吉林大學。
