旺角
出自維基百科，自由嘅百科全書
旺角(Mongkok)係喺九龍半島中部嘅油尖旺區，屬於香港特區入面嘅其中一個地區。喺呢個地方入面，無論新舊樓都有；舊樓嘅地鋪多數都係鋪頭或者餐廳。以彌敦道為界，購物中心集中喺東面，住宅區喺晒西面。旺角嘅交通非常發逹，有巴士、東鐵、地鐵，又有通宵專線小巴。而假日嘅彌敦道以東一帶重成日會有好多人行。
旺角嘅人口密度極高。根據《健力士世界紀錄大全》，旺角係全球人口密度最高嘅地區，平均密度每平方公里有13萬人。
目錄 |
[編輯] 歷史
旺角古時叫做芒角，因為嗰度芒草叢生，地形好似一隻牛角伸咗入海嗰度咁，所以啲人叫嗰度做芒角嘴，附近嘅村落就得咗芒角村呢個名。2004年5月喺通菜街同豉油街鬧市交界嘅一個深度只有兩米嘅渠務地盤裡面，發掘咗好多東漢、晉朝同唐朝嘅陶器以及製陶工具出嚟，即係話喺千幾年前，已經有人住喺旺角。
芒角村喺而家嘅洗衣街附近，以前多數都係種菜、種花、養豬同養雞。不過自從1860年，芒角跟住九龍半島割讓畀英國之後，芒角村嘅村民就開始將自己種嘅花、蔬菜同自己養嘅禽畜拎去港島賣。當時嘅人多數坐蜑民嘅船過海，但係啲蜑民成日將個「芒」讀咗做「望」，結果英國人跟咗蜑民嘅口音，將芒角講做Mong Kok。到咗1909年，港英政府開始喺嗰頭填海同起左個避風塘，而附近亦開始有碼頭同道路。1930年代，芒角就改咗個名做旺角，話係“興旺”咁解。嗰時嘅旺角仲係一個工業區，四周圍都係製煙廠、棉織廠同五金廠。不過旺角嘅英文譯名(Mong Kok)就無變，依家仲有啲水上人鐘意叫旺角做「望角」架。
旺角彌敦道以西嘅地方都係填海得來。而家嘅新填地街喺1950年代嗰陣仲係海邊嚟。不過今時今日，旺角呢個地方，正如佢個名一樣，已經成為咗一個好旺嘅購物區同住宅區嘞。
[編輯] 特色
旺角有好多特式街道：
- 女人街——即係通菜街，喺登打士街同亞皆老街之間嘅一段。因為有好多賣服裝、化妝品、擺設之類嘅女人嘢而咁叫。
- 雀仔街——即係康樂街，因為有好多賣雀鳥嘅鋪頭而咁叫。康樂街喺1998年因市區重建而清拆，好多鋪頭安排搬到旺角火車站嘅園圃街雀鳥花園，而原本嘅地方就就起左一座「朗豪坊」。「朗豪坊」包括一間五星級嘅「朗豪酒店」、一幢寫字樓同埋一座樓高十幾層，附設電影院、百貨公司同埋食肆嘅大型購物商場。
- 波鞋街——即花園街其中一段，因為有好多賣運動鞋嘅鋪頭而咁叫。
- 金魚街——通菜街一段，因為有好多賣飼養魚嘅鋪頭而咁叫。
- 花墟道——因為有好多批發及零售花卉嘅鋪頭而咁叫。
- 西洋菜南街——同女人街並排而立，有好多專賣潮流服飾、電子產品同埋小食嘅鋪頭，係其中一個深受香港後生仔女歡迎嘅消費熱點。
- 登打士街——女人街尾同西洋菜街南尾嗰度，周街都係賣小食嘅鋪頭，同埋有好多樓上咖啡店，亦係深受香港後生仔女歡迎嘅地方之一。
旺角亦有好多商場：
- 朗豪坊、新世紀廣場、旺角電腦中心、信和中心、好景商場、瓊華中心、先達廣場、旺角中心、Chic之堡、潮流特區
旺角多數賣潮流物品，成日去旺角玩嘅人會被稱為「MK人」，即Mong Kok 嘅簡稱。
[編輯] 交通
[編輯] 主要交通幹道
- 彌敦道
- 旺角道
- 亞皆老街
- 西九龍走廊
[編輯] 公共交通
- 綠色專線小巴
- 綠色通宵專線小巴
- 紅色公共小巴
