梅開二度

出自維基百科，自由嘅百科全書

梅開二度係一句成語，意思即係話同一件事成功咁做到兩次。

[編輯] 典故

哩句嘢其實係來自傳統戲曲嘅劇目【二度梅】，而哩齣戲曲係取材自同故事嘅古典小說；個典故係咁嘅：

話說喺唐朝唐德宗在位嘅期間，忠臣梅伯高一家人俾奸相盧杞陷害，搞到要滿門抄斬，得返個仔梅良玉一個走甩咗，後來佢化名叫王喜童嚟掩人耳目；佢一個人流落到街上面，飢寒交迫之際，好彩遇到陳日升（陳東初）將佢收留，陳日升唔知道佢嘅身世，只當佢係一般嘅可憐人，請咗佢返屋企幫手打理陳府嘅梅花園，先至唔駛餓死街頭。

陳日升係梅伯高嘅同窗好朋友，當時佢俾盧杞迫害嘅時候，就係梅伯高救返，不過就係因為咁而搞到梅伯高同盧杞結下牙齒印，最後仲搞到全家抄斬；陳日升因為咁而悲憤交雜，於是索性辭官唔撈，舉家歸隱楊州。

陳日升有個女叫陳杏元，生得國色天香，梅良玉去到陳家之後，兩個人就一見鍾情。

喺一個梅花盛開嘅日子，亦係梅伯高嘅忌辰，陳日升同埋屋企人一齊係屋企嘅梅花園度開壇悼念亡友兼恩人，點知忽然間天色大變，仲發起大風雪，將啲梅花通通打爛哂，陳日升感慨自己能夠逃出生天，但係就連梅家嘅後人都救唔到，認為哩啲係上天對佢嘅警示，於是佢發誓除非梅花再次開花証明梅家嘅後人仲喺世上，唔係的話就遁入空門，削髮為僧；佢個女杏元聽到咁，即刻上香誠心咁求上天令到梅花重開，點知佢哋嘅真誠真係感動到上天，梅花園嘅所有梅花樹都再次開花；後來陳日升知道咗原來喜童就係良玉，於是就將個女杏元許配俾佢。

（欲知故事詳情，可以參考劇目【二度梅】，或者【陳杏元落院】……等等哩啲相關嘅戲曲）

因為哩段典故，所以就有「梅開二度」哩個成語嘞。