沙田區
出自維基百科，自由嘅百科全書
沙田區（Sha Tin District），係香港十八區嘅其中一個區，響新界嘅中東部。沙田區面積6,940公頃，參考2004年香港政府嘅估計，人口637,000人，係全香港最多人口嘅區域。而沙田亦係新界頭三個新市鎮（舊時叫衛星城市）嘅其中一個，響1960年代開始發展。
沙田區原本只係沙田海同埋城門河兩岸的填海地，包括大圍、火炭、禾輋、石門、小瀝源、圓洲角同埋馬料水等等地方。家下沙田新市鎮亦都拓展到去馬鞍山，包括烏溪沙等地方。
[編輯] 交通
鐵路交通方面，全長11.4公里嘅九廣馬鐵2004年12月21日啟用，連接馬鞍山一帶同大圍，連埋區內九廣東鐵沿線嘅大圍站、沙田站、火炭站、馬場站同埋大學站，向南通去九龍區，同向北通去新界北區、中國大陸都好方便。建議中嘅沙中線仲會由沙田區經九龍東部一直連接到香港島嘅中環，令到沙田區交通更加方便。
公路建設方面，沙田區有大老山隧道連接九龍東、獅子山隧道同大埔道連接九龍中、城門隧道連接新界西嘅荃灣區、吐露港公路連接大埔區，重有西沙路同T7路連接西貢區。
8號幹線青衣至大圍段（包括南灣隧道、昂船洲大橋同埋尖山隧道等等）而家起緊。呢條幹線可以將沙田嘅交通更直接咁分流到荔枝角、葵涌、香港國際機場一帶。工程預計2007年完工，到時從沙田至機場嘅車程將縮短到35分鐘。
而家沙田區一共有大約110條巴士線，走勻全區。
[編輯] 區內文康、娛樂設施
- 單車徑
- 沙田大會堂
- 沙田公園
- 沙田馬場（香港第二座賽馬場，1978年開幕）、彭福公園
- 香港文化博物館（介紹香港傳統文化習俗，係全港規模最大嘅博物館，晌2000年啟用）
- 道風山
- 望夫山
- 萬佛寺
- 車公廟
- 曾大屋
- 史諾比開心世界（新城市廣場內）
- 獅子山郊野公園
- 馬鞍山郊野公園
- 馬鞍山運動場
