阿爸

出自維基百科，自由嘅百科全書

阿爸，即係爸爸、父親，老豆^[1]、老頭子，而古時嘅中國就叫爹，英文係 Father，親暱啲會叫爹吔(Daddy)。

中國唔同時代皇族都有佢自己一套叫法。大清嘅皇族就會叫佢哋嘅阿爸做皇阿瑪。

[編輯] 定義

爸爸通常係雄性，係仔女對同自己媽媽性交而生出嚟嘅人嘅稱呼，係有直接血緣關係。不過有時候，就算唔係由哩個人嘅精子而生，但係哩個人獻出咗養育之恩，咁被佢養育嘅人都可以叫佢做爸爸（即係義父）。

如果親生爸爸離咗世或者離咗婚而唔再同媽媽一齊，但係媽媽就嫁咗畀另一個男人，咁哩個男人就會成為啲仔女嘅「繼父」(又稱為「後父」)。

註1：其它雄性生物都有作為阿爸嘅位置，但因為佢哋唔識用人類言語表達，哩度唯有用人類嚟做指標。
註2：對於「爸爸必定係男人」嘅哩個理論，喺今時今日嘅多元化社會已經唔係必然。

[編輯] 父愛

一般嚟講，阿爸喺倫理關係圖裡面相比起媽媽可以話喺尊敬角度上面差咗少少，但係都值得尊敬嘅（除咗少數個別例子），因為佢雖然只係獻出咗一粒精子，而且冇懷胎十月大住個肚，普遍形象亦都十分之嚴肅好似冇乜人情味咁，但係佢為咗養育仔女而默默咁不辭勞苦辛勤工作，無怨無悔，可能喺教導嘅方式上比較嚴厲，不過心裡面其實都會愛自己嘅仔女。所以話阿爸係一個偉大嘅人亦相信絕大部份嘅人都會贊同，因為除咗以上講嘅之外，有啲爸爸為咗仔女，仲會不惜犧牲自己，甚至獻出生命嚟作出保護；以上哩啲行為就稱之為「父愛」。

有好多電視或者電影都會用父愛嚟做橋段，就好似香港有一套2006年出品嘅電影叫做《父子》，戲裡面刻劃出爸爸同個仔之間嘅愛，由關愛到到茅盾，然後一齊發掘幸福，係令人感受好深嘅電影之一。套戲係由郭富城飾演阿爸，而當時只得九歲嘅小童星吳景滔就飾演做仔仔。（至於一齣美國嘅經典電影系列《教父》(God Father)，因為裡面講嘅係關於幫會嘅嘢，同爸爸哩個角色關係唔大，所以唔算係有父愛嘅電影）

另外，為咗尊崇阿爸對仔女嘅父愛，喺1910年開始，每年六月嘅第三個星期日都會為「父親節」而慶祝。

[編輯] 另類父親

除咗人同埋動物入面有生育能力嘅雄性生物有資格成為人哋阿爸之外，喺充滿情感嘅人類世界入面，對於一個有感情嘅地方或者有感情嘅事物，甚至敬拜嘅神靈……等等哩啲，都可以用父親嘅名號嚟稱呼，好似：

天父／聖父：　天主教及基督教入面，天主嘅別稱，亦係三位一體嘅聖三中最高，因為跟據聖經所講佢獻出咗聖子落凡間為人，用聖子耶穌嘅死去救贖人類，於是被稱為世人之父。
神父：　係天主教嘅神職人員之一，專職幫人類向天主傳話同埋傳達天主對人類講嘅說話（傳福音），亦係每個彌撒中負責成個聖道禮儀嘅主持者。
國父：　即係對於開創國家有莫大貢獻，以畢生成就國家前途嘅人。中國嘅國父就係孫中山（又叫孫文）。
外父：　話係另類係因為佢唔屬於一個人本身直系親屬列表裡面嘅人，亦都冇養育之恩，但係又好有親戚關係；佢就係一個男人對佢老婆嘅阿爸嘅稱呼。至於一個男人對佢嘅外父有冇感情則係好個別，冇得深入討論；但係跟據「愛屋及烏」嘅道理，唯有計佢係有感情嘅對象。