雲尼斯杜萊

出自維基百科，自由嘅百科全書

雲尼斯杜萊

雲尼斯杜萊（Ruud van Nistelrooy，1976年7月1日—），又稱為雲佬，係一個荷蘭足球員，依家效力西班牙球隊皇家馬德里。佢亦都係荷蘭國家足球隊嘅成員之一，司職前鋒。

[編輯] 簡史

雲佬喺1993年以青訓球員身份效力當時係荷蘭乙組球會嘅丹保殊（FC Den Bosch），開始咗佢職業足球員生涯，佢為球隊上陣過69場射入咗17球。1997年加盟咗荷蘭另一支球隊海倫芬（SC Heerenveen），為球隊31場射入13球。喺佢22歲生日果日以420萬英鎊轉咗去PSV燕豪芬（PSV Eindhoven）搵食，打破當時荷蘭本土轉會費紀錄。佢係PSV燕豪芬首季已經射入31球成為嗰屆荷蘭聯賽嘅神射手，可惜喺歐洲金靴獎以2分之差輸左畀英格蘭射手菲臘斯，得個亞軍，同時佢成為該年荷蘭足球先生。佢喺2000年4月右膝受傷，不但令佢冇得踢2000年歐洲國家盃，更因為咁而未能通過體測被拒絕加盟英超球隊車路士（Chelsea）。後來佢成功克服咗膝傷，於2001年3月再次返回球場比賽。喺效力PSV燕豪芬期間上陣聯賽67場射入咗62球。

雲尼斯杜萊曾經效力曼聯

雲佬喺2001年 7月1日以破紀錄1900萬英磅轉咗去英超球隊，有「紅魔鬼」之稱嘅曼徹斯特聯隊（Manchester United，簡稱「曼聯」），仲著起咗代表前鋒嘅10號波衫。佢喺踢曼聯嘅首季已經幫球隊上陣32場射入23球，憑住佢本人出色嘅表現，贏得2002年英格蘭最佳球員。但荷蘭喺世界盃外圍賽出局，再次令雲尼斯杜萊錯過國際大賽。2002/2003球季，佢除咗為曼聯贏取英格蘭超級聯賽冠軍外，仲打破咗曼聯球員喺歐洲賽事入球嘅紀錄，而獲得2003年歐洲足協最佳前鋒嘅美譽（喺02/03歐洲聯賽冠軍盃上陣9場入12球，成為嗰屆嘅神射手）。

2003年11月19日，荷蘭喺歐洲國家盃外圍賽對蘇格蘭嗰陣，球隊喺首回合落後1球下，靠佢連中三元，最終贏6-0出線。

2004年佢代表荷蘭參加歐洲國家盃，首次出席大賽。首場對德國就憑佢入波追平對手。荷蘭雖然輸咗畀捷克，但係又可以以小組賽次名出線。最終荷蘭喺四強不敵東道主葡萄牙。

喺2006年世界盃外圍賽之中，雲佬係以荷蘭神射手嘅姿態進入32強。可惜，矢志要博取曼聯領隊費格遜支持嘅雲佬，喺3場分組賽賽事之中，只係入咗一球。喺16強大戰葡萄牙嘅賽事之中，荷蘭隊教練雲巴士頓（Marco Van Basten）更要佢做後備，直至完場雲佬都冇出過場。嗰場比賽之中，荷蘭以一球輸咗畀葡萄牙，而賽事裡面更出現咗16張黃牌，4張紅牌，打破咗世界盃單場賽事發出最多紅黃牌嘅記錄。

其實喺曼聯生涯嘅尾段，雲佬同曼聯領隊兼主教練費格遜爵士（Sir Alex Ferguson，人稱「費sir」、「費爵爺」、「老佛爺」）唔妥嘅情況已經有惡化嘅趨勢。有時因為特別原因，雲佬間唔中會俾費Sir雪藏，或者冇狀態而被編做後備，上陣次數大減；而費格遜起用嘅曼聯另一法國籍前鋒沙夏（Saha）表現亦不過不失，喺費Sir開始重用沙夏嘅環境之下，雲佬雖然仍好想留喺曼聯效力，但亦自覺冇癮而開始想轉去其他球隊發展。喺2005/2006年球季嘅最後階段，費格遜同雲佬嘅關係終於決裂，喺2006年FIFA世界盃足球賽之後，雲佬就以大約1030萬英磅轉會過咗檔去仍然喺西班牙甲組足球聯賽打滾嘅頂級球會皇家馬德里（Real Madrid，簡稱「皇馬」）。

睇返雲佬喺效力曼聯嘅五個球季，一共二百幾場嘅比賽入面射入對手龍門嘅波達到150球，哩個紀綠絕對能夠列為神射手級別。除此之外，佢喺足球場上獲得嘅榮譽都真係唔少，先後奪得過歐洲地區嘅「足球先生」、「神射手」等嘅獎項，又創下咗多項歐洲地區嘅最多入球紀錄，其中包括有自英超開始以來，第一位球員喺連續八場賽事裡面都有「士哥」（入球）。雲佬嘅「多產」同埋咁多嘅豐功偉績，成為咗足球場上嘅一代傳奇，亦同時成為曼聯球隊歷史中其中一位最有貢獻嘅偉大球員。

[編輯] 2006年轉會事件

喺2005/06年球季就嚟要結束嘅最後一場聯賽賽事入面，雲佬因為唔滿意領隊費格遜唔畀佢做正選嘅安排，喺賽前好嬲咁獨自離隊返咗屋企。有傳話雲佬喺賽前曾經同葡萄牙籍嘅小隊友基斯坦奴．朗拿度（Cristiano Ronaldo，人稱「C朗」）有過口角及差啲動武，事緣話因為喺隊伍操練嗰時，雲佬攞C朗仙遊咗嘅爸爸嚟講笑，語中帶刺咁話佢同一樣係葡萄牙人嘅曼聯助教奎羅斯好似父子咁，暗示助教處處偏坦C朗，令C朗極度唔滿意而發生咗衝突；因為雲佬已經唔止一次喺操練時同隊友口角或者郁手，費格遜容忍到咗極限，驚住咁落去球隊好可能會出現分化情況，唯有安排雲佬坐喺後備席廂以示懲戒，點知反而招嚟雲佬喺最後一場聯賽前嘅離隊出走，開動咗「費雲恩怨」嘅計時炸彈。

後尾曼聯老闆同費格遜開會考慮要將雲佬「放盤」，希望搵西班牙球會馬德里體育會（Club Athletic Madrid，簡稱「馬體會」）交換旗下一位年青猛將－－－費蘭度．托利斯（Fernando Torres），馬體會當然唔會咁輕易就用一個年輕猛將換取年屆三十嘅雲佬，於是就開價除咗球員互相交換仲要另加一千萬英磅，曼聯見對方獅子開大口，於是交易就不了了之，而馬體會會長後來再發表聲明，話佢哋個猛將托利斯係非賣品，唔駛再搵佢哋開價。再後來又傳出曼聯高層願意將雲佬以低價一千萬磅賣出去，當時意甲嘅著名球會國際米蘭（Inter-Milan）即刻表示有興趣，但哩件事因為2006年世界盃嘅開展而暫時擺埋一邊。

世界盃之後，西甲勁旅皇家馬德里加入要搶雲佬過檔，但係雲佬自己就表示想去德國搵食，目標係德國甲組冠軍隊伍拜仁慕尼黑（Bayan Munich，簡稱「拜仁」）。曼聯於是開價一千八百萬英磅同皇馬交涉，但係皇馬淨係願意俾一千萬磅轉會金嚟買雲佬，雙方討價還價之後，皇馬願意用一千二百萬英磅作為收購條件，而且應承如果雲佬喺賽季之後成為嗰年嘅神射手，會額外俾多一百萬英磅作為酬謝獎金，但係曼聯決意將雲佬嘅轉會金鎖定一千五百萬英磅，於是哩單交易呈膠著狀態；期間皇馬官方網站錯誤咁將雲佬已加盟皇馬嘅消息對外公佈，冇幾耐之後即刻收返，仲要拿拿林同廣大傳媒澄清同埋道歉。哩個時候嘅拜仁仍然對雲佬加盟抱有好大嘅信心。

2006年7月底左右，費格遜單方面表現溫和咁表示，如果雲佬仍然留低幫曼聯打江山，所有人都會因為咁而高興，暗示主僱嘅關係有冰釋嘅可能。但係另一邊廂喺曼聯老闆格拉沙（Glazer）嘅推波助瀾同施壓之下，球會終於喺同月嘅28日同皇馬達成初步協議，同意收取大約一千五百萬歐元（約一千零三十萬英磅）將雲佬賣畀皇馬，仲喺同月29日通過體檢，正式簽咗三年合約，成為皇馬旗下嘅殺手。雲佬喺接受媒體訪問時話，佢好感謝費格遜當初願意等待一個球季嚟俾佢養傷，傷癒之後仍然肯出高價將佢帶入曼聯，諗返真係欠費格遜好多，不過因為師徒關係已經達到決裂仲要係無可挽救嘅地步，唯有忍著萬般悲痛咁離開曼聯。費格遜亦都回應話雲佬的確係一個好球員，但係因為紀律問題而畀人放喺後備廂係每個球員都應該接受，係唔明點解雲佬會咁睇唔開。