香港科技大學
出自維基百科，自由嘅百科全書
香港科技大學（英文：Hong Kong University of Science and Technology，HKUST），簡稱科大，係香港第三間大學。響1991年10月招收第一批學生。大學校園響清水灣半島，依山面海，飽覽牛尾海嘅怡人景色。
大學而家有四個學院，係商學院、理學院、工程學院同埋社會科學院。截至2007年1月，大學有學生9000人，教學人員453人。
[編輯] 歷史
香港科技大學係因為1980年代經濟結構轉變而起。因為香港已經進入經濟轉接期，香港政府預期香港會轉向高科技同商業，工商業要求有更多大學生配合。所以當時香港政府就決定起第三間大學，配合呢個需要。咁啱呢個時候中英已經簽咗聯合聲明，英國會響1997年交香港畀中華人民共和國，英軍就一批批撤走。響1986年，響大埔仔嘅Kohima Camp清走用來起香港科技大學，起之前香港童軍總會重響個地方搞咗個大露營。
1988年，大學重未起好。吳家瑋就做咗呢間未來大學嘅校長。起緊呢段時間，香港嘅通貨膨脹好犀利，所以好快就超支。到佢起好第一期，超支呢一項就備受各方指責。因為大學設備先進，所以俾社會抨擊係勞斯萊斯大學，俾人話奢侈。另一方面，間大學無用比賽第一名個設計，亦都俾議員質疑。呢啲批評響大學初頭幾年一直無停過。更加弊嘅係，香港賽馬會同政府畀嘅錢係唔夠起第三期，所以吳校長一直周圍搵人捐錢去起埋其餘部份。不過，經過大學多年努力，亦證明到當年投資係物有所值，近來亦唔見有人提起呢啲批評。
[編輯] 歷任校長
- 1991年—2001年：吳家瑋
- 2001年至今：朱經武
