Alemannia (Deutschland)
Us der alemannische Wikipedia, der freie Dialäkt-Enzyklopedy
E vu latiinisch Alemannia abglaititi Schribwiis isch in viile Sproche de Namme fer Dytschland. Fer witteri Bedütige vu Alemannia lueg under Alemannia.
D'Gliichsetzig vu Alemannia un Dytschland füehrt oft zue Verwexlige, wil mer in sällene Länder under Alemanne Dytschi verstot un nit d'Sprecher vu ere dytsche Dialektgruppe.
Dass Alemannia als Bezaichnig fers alemannisch Sprochgebiit wohl au in Dytschland nit grad gängig isch, dürft aber nit bloß an de politische Ufdailig vum alemannische Sprochgebiit in mehreri Länder un de große Underschiid vu de ainzelne alemannische Dialekte liige. Dass mer nämlig au in beliebte Urlaubsländer wie Spanie oder de Türkei under Alemannia ebe Dytschland verstot, dürft au ä Näbeeffekt bi de dytsche Urlauber ha, wo mer nit underschätze sott: In dene baar Brocke Landessproch, wo sie läre mien, um sich mit de Ihaimische z'verständige, bezaichne si sich sozuesage als Alemanne. Es dät dorum mit verwundere, dass au in große Daile vu de dytschsprochige Bevölkerig de latinisiert Begriff Alemannia als synonym mit Dytschland agsähe wird. In de Schwyz degege haißt de dytsch Dialekt Schwyzerdytsch un alli Dytsche sin Schwobe. Die welsche Schwyzer versten under Allemagne jo ohnihi Dytschland. D.h. au dert dürft ä menke mit Alemannisch als wisseschaftlich korrekti Bezaichnig fer Schwyzerdytsch oder au mitem Begriff Alemannia nit viil afange chänne. Im Elsiss schließlich wird wohl chum ä Elsässer ebberem us Innerfrankriich ohni ä langi Erchlärig sage chänne, s'Elsiss läg in ere Alemannia. So schribt die französisch Wikipedia am End vu 2005 yber d'Alemanne in de Vergangehait: Les Alamans ou Alémans étaient un ensemble de tribus germaniques. [1] Alémanique wird dert mit Alsacien glichgsetzt - es isch ä Page de redirection.
Folgendi Wikipedias betitle z.B. ihr Artikel yber Dytschland mit eme vu Alemannia abglaitete Begriff, wie de folgend Uszug us de Interwiki-Links vum dytsche Wikipedia-Bitrag yber Dytschland zaigt:
| Wikipedia | Dytschlandartikel |
| Aragonesisch | Alemaña |
| Aserbaidschanisch | Almaniya |
| Asturisch | Alemaña |
| Baskisch | Alemania |
| Französisch | Allemagne |
| Galicisch | Alemaña |
| Katalan | Alemanya |
| Kernewek | Almayn |
| Kurdisch | Almanya |
| Lingala | Alémani |
| Nahuatl | Alemantlan |
| Okzitanisch | Alemanha |
| Portugiesisch | Alemanha |
| Spanisch | Alemania |
| Tagalog | Alemanya |
| Türkisch | Almanya |
