Cernunnos
Us der alemannische Wikipedia, der freie Dialäkt-Enzyklopedy
De Cernunnos isch e Gott vode Fruchtbarkait vo de Chelte, wo miteme Hirschgwaih dargstellt werd.
Inhaltsverzeichnis |
[ändere] Name
De Name isch nöd aihaitlich überliferet. Ufem Nautedenkmol vo Paris (Pillier de Nautes; Nautæ Parisiaci) werd er [C]ERNVNNOS gnennt, währed e Metallplatte vo Seinsel-Rëlent (Luxeburg) em DEO CERVNICO gwidmet isch. E gallo-griechischi Inschirft us Montagnac (Hérault) nennt en καρνονου. Es werd agnoo, as de Name vo ie. *cerH-no- "Horn" abglaitet isch (vgl. alem. Horn; lat. cornu).
[ändere] Darstellig
De Cernunnos werd as e Maa wo ufem Bode sitzt dargstellt. Er het maistens ai Bai unterschlage (Schniidersitz), wa vode Cheltologe fälschlicherwiis as "Buddha-Haltig" bezaichnet worden isch. Us sinere Stirn waxt e Hirschgwai. Mengisch sind die Gwaih gschmückt mit je aim Torques, so ufem Nautedenkmol. Ufem Chessel vo Gundestrup und de Felszaichnig im Val Camonica trait er aber en Torques i de rechte Hand. Tier wonen biglaitet sind de Hirsch, de Muni und d Schlange. Well er au miteme Geldseggel dargstellt werd, chan er als Fruchtbarkaitsgott dütet werde. Vom ikonologische Typ her, chan er as Herr vo de Tier bezaichnet werde.
Möglicherwiis stellt au d Bronzestatue us Bouray (südlich vo Paris) de Cernunnos dar. Zwor isch de bartlosi Jüngling miteme enge Torques um de Hals ohni Gwaih dargstellt, aber sini unterschlagene Füess endet i Hirschhuf.
Die maiste vode mee as 30 Darstelige vom Cernunnos stamet usem östliche Gallie.
[ändere] Witerlebe
Es werd vermuetet, as de Cernunnos i de englische Saagegstalt Herne the Hunter witerlebt. Sicherer isch da bim bretonische Hailige St. Corneille, wo de Schutzpatron vo de ghörnte Tier isch.
[ändere] Büecher
- Bernhard Maier, Lexikon der keltischen Religion und Kultur; Kröner, Stuttgart (1994). ISBN 3-520-46601-5
- S. & P.F. Botheroyd: Lexikon der keltischen Mythologie; Diedrichs 1992. ISBN 3-424-01077-4
