Internet Movie Database

Us der alemannische Wikipedia, der freie Dialäkt-Enzyklopedy

D Internet Movie Database (IMDb) isch e Datenbank über Film, Fernsehserie, Videoproduktione und Videoschpiil und über die Persone, wo draa mitgwürkt händ. Aktuell gits Iiträg zu meh als 482'000 Filmproduktione vo allne Arte und zu über 1,9 Millione Mensche. D Nutzig isch grundsätzlich choschtelos. Gege Bezahlig büütet IMDbPro.com es zuesätzlichs Informationsaagebot (aktuelli Box-Office-Schtatistike, Zuegriffsschtatistike, Agente-Kontakt etc.) aa.

I dr Datebank befindet sich en Grossteil vo allne Kino- und sehr viile Fernsehfilm, wo sit Aafang vo dr Kinematographie dreiht worde sind. Anders als bi ähnliche Projekte werded au pornografischi Produktione archiviert. Fehlendi Informatione chönnd vo de Bsuecher (nach vorheriger Regischtrierig) naatreit werde.

Es chann sowohl nach Filme als au nach Persone, Film-Charaktere, Zitate, innerhalb vo Biographie und (über verschiedeni erwiiterti Sueche) nach viele wiitere Aagabe gsuecht werde. Dr Umfang vo de aabotene Informatione isch abhängig vom Bekanntheitsgrad vo de Film und Persone oder devoo, wie viil Material dur interessierti Persone a IMDb übermittlet worde sind. Wil Film und Stars us Hollywood weltwiit am bekanntischte sind, gits dezue au meischt bsunders viili Informatione.

Bsuecher chönns zu Filme Bewertige und Kommentar abgee, wo dänn nach eme uf dr Bayessche Wahrschiinlichkeitsverteilig beruehende Syschtem uusgwertet werded. Zum eine wird ab 5 abgehne Schtimme en Durchschnittswert berechnet, zum andere nach eme wiitere Berechnigssyschtem e Lischte vo de 250 (i dr IMDbpro-Version 500) beschte und 100 schlechtischte Film. Sit Juli 2006 chann mer nümme nur einzelni Film, sondern au Fernsehserie bewerte.

Bi dr düütschschprachige Version vo dr IMDb sind bisher nur einzelni Begriff uf de Filmsiite (zum Biischpiil Schauschpieler schtatt Actor) is Düütsche übersetzt worde.

Als Alternative gits d OFDb, d Online-Filmdatebank. Sie büütet zwar wesentlich kompakteri und abgschpeckteri Informatione und Inhalte, isch aber komplett düütschschprachig.

[ändere] Gschicht

Dr Urschprung vo dr IMDb liit i dr Newsgroup rec.arts.movies, ere Diskussionsplattform für Filmbegeischterti. Wiit vor 1990 händ einigi Teilnehmer demit aagfange, Lischte über Schauschpieler, Regisseure und anders z füehre und regelmässig über rec.arts.movies z veröffentliche. Im Oktober 1990 händ sich i dene vo Hand gfüehrte Lischte über 23'000 Iiträg gfüehrt, wo de Col Needham mit Hilf vo einige Programm zämegfüehrt und durchsuechbar gmacht hät – s Ergebnis isch d Internet Movie Database: Episode I – The Text-Only Unix Version. S System isch mit em hüt verfüegbare chuum vergliichbar gsii, zu dem Ziitpunkt hät no jede Benutzer die gsamti Datebank auf siin eigene Rechner kopiere müesse, um sie benutze z chönne.

1993 isch die Datebank per E-Mail zuegänglich worde, und churz druuf, no bevor dr erschti grossi Webbrowser NCSA Mosaic usechoo isch, hät di erscht Web-Version Gschtalt aagnoo.

Die schtiigendi Aazahl v Benutzer und Date häts 1996 erforderlich gmacht, dass s private Projekt IMDb under heftige Debatte pro/contra Kommerzialisierig in e Firma umgwandlet worde isch. Eigetümer vo dr Firma sind diejenige gsii, wo au bislang die Lischte gfüehrt händ. D Arbet a dr IMDb und für d Internet Movie Database, Ltd. händs meischtens nebe Schuel, Schtudium und Beruf erlediget.

Bis 1998 hät sich d Grössi vo 1996 nomal verdopplet, und dr Ressourcebedarf hät d Möglichkeite vo ihrer nebebrueflich und praktisch unentgeltlich arbeitende Eigetümer z überschtiige droht. Nachdem wege dr Befürchtig, dass s Projekt i siini Beschtandteil zerleit werde würded, bereits mehreri Chaufaagebote uusgschlage worde sind, isch d IMDb 1998 as Internet-Versandhuus Amazon.com gange.

D Wurzle vo dr IMDb sind au hüt no erkennbar. D Datebank lebt zu grosse Teile nach wie vor vo dr Mitwürkig vo dr Netzgmeind und git ihri komplette Beschtänd nach wie vor choschtefrei a d Netzgmeind zrugg, nöd nur über d Portalsiite, sondern au in Form vo Rohdate.

[ändere] Bewertige vo IMDb

Registrierti Nutzer chönnd mit Punkte vo 1 bis 10 alli Film bewerte. Sind gnüegend Bewertige zämechoo, wird en Durchschnittswert errechnet, und händ no viil meh Persone e Bewertig abgee, chann dr Film bi gnüegend hohe (oder tüüfe) Punktzahl i dr Ranglischte vo de beschte oder schlechtischte Film erschiine. Die Lischte gits global für alli Film und für Filmgenres (Dokumentatione, Chriegsfilm, Drame etc.) Ebenso chann mer uf de personebezogene Artikel under „sorted by rating“ gsee, wie guet d Film vomene Regisseurs oder eme Schauschpieler underenand abschniided.

Um zu de 250 beschte Filme zghöre, muess en Film momentan vo mindeschtens 1'300 Nutzer mit ere durchschnittliche Punktzahl vo mindeschtens öppe 7,8 bewertet sii. Allerdings langet das nöd immer, wil IMDb no wiiteri, nöd dr Öffentlichkeit bekannti Wert verarbeitet.

D Wertig vo de Film wird durchuus manipuliert. Dr Film „Daniel - Der Zauberer“ mit em Daniel Küblböck isch langi Ziit als „schlechtschte Film“ bewertet worde, nach em Uufruef uf dr Diskussionssiite die zwiifelhafti Ehre nöd eme düütsche Film z überlaa hät e grossi Aazahl vo amerikanische Nutzern mit Höchschtpunktzahl für de Film gschtimmt und hät ihn düütlich vo dere Position verdrängt^[1].