Mars (Planet)
Us der alemannische Wikipedia, der freie Dialäkt-Enzyklopedy
 |
Dialäkt: Markgräflerisch (Ebringe) |
De Mars isch, vu de Sunne us gsähne, de veert Planet in unserem Sunnesystem. Er zellt zue de erdähnliche (terrestrische Planete). Ufgrund vu sinere (bluet)rote Farb isch er nochem römische Chriegsgott Mars bnennt worre un wird oft au als de Rot Planet bezeichnet.
Symboliseert wird dε Mars dur e Chreis miteme Pfiil wo schräg noch rechts obe zeigt: 
Säll Zeiche, wo e Schild mitem dehinder stohende Speer darstelle sott, stoht fer de remisch Chriegsgott. In de Biologi symboliseert's s'männlich Gschlecht.
De Mars bsitzt zwä zimli chlaini, uregelmäßig gformti Mond, Phobos un Deimos (griech. Furcht un Schrεckε, in de Mytholigi d'Söhn vum grichische Chriegsgott Ares, wo im römischen Mars glichgsetzt gsi isch).
Wäge sinere mysteriöse rote Färbig het de Mars scho immer d'Mensche faszineert. D'Färbig selber verdankt de Planet Iiseoxid-Staub, wo sich uf de Obεrflächi un in de Atmosphäre verdeilt het. Somit isch de Mars e „rostige“ Planet.
