Dominio (biolochía)
De Biquipedia
En biolochía, dominios (también ditos superreinos ó imperios) están cadaguna d'as tres prenzipals cuaternazions d'es sers bibos: Eubacteria (ó Bacteria), Archaea y Eukarya.
Dica fa pocas añadas encara se cuaternaban es sers bibos en reinos sines d'autra clasificazión superior que no estiese la de procariotas ó eucariotas pendendo d'a suya manca ó abenzia de nuclio, respeutibament. Agora, es modernos estudeos d'o ran molecular (espezialment de l'estrutura de lipidos, proteinas y azidos nucleicos) han amostrato que, también aintre d'as procariotas bi ha diferenzias prou grans como ta trestallar-ne dos grans agrupazions, que poderban estar consideraus tan diferenz d'entre ers como yeran abantis consideraus as bacterias y eucariotas.
Autualment, es dominios están es taxons més altos d'a clasificazión biolochica, y sines de dar-lis importanzia t'os sinnificatos d'es suyos nomes, reflexen ras diferenzias ebolutibas esenzials que bi han escaizido en ros chenomas d'es organismos, á mientres de l'istoria d'a bida en ra Tierra, dica l'autualidat.
Iste sistema, clamato d'es Tres Dominios, estiere desiñato per Carl Woese en ro 1990 ta sustituir es antigos sistemas cladisticos d'es Dos Dominios (ro primero en existir) y d'es Seis Reinos (emplegau dic'á fa pocas añadas).
- Ro Sistema d'es Dos Dominios, estió ro primero en estar presentau, cuan es zentificos d'o sieglo XIX s'afainaban á prebar nuebas clasificazions d'os sers bibos alazetadas en ro sistema d'a nomenclatura binominal de Carl von Linné. En ras suyas primeras añadas cuaternaba un "dominio" clamau Mineralia (es minerals) que se contracaraba con ro "dominio" clamau Biota ó d'es sers bibos. Dimpués d'ista clasificazión, cuan es minerals estieron separaus, s'encludiyoron es dominios Cytota (t'os sers bibos formaus per como minimo una zelula, ro cuo sinnifica tal y como los-ne consideramos güei) y Acytota t'es "sers bibos" sines de zelulas (birus, birions, prions...). Fuera d'as polemicas autuals sobre ra pertenenzia d'istas zagueras "particlas" t'es sers bibos, iste sistema estió reformato per ras escuelas "bi-doministas" de cladistica, ra mayoría norteamericanas, que encara güei resistixen-se t'abandonar-lo, y ras cuas preban de fer-lo azeptable considerando dos unicos dominios autuals: procariota y eucariota.
- Ro Sistema d'es Seis Reinos ye una modificazión, feta en ra decada de 1980, de l'anterior sistema "d'es Zinco Reinos" de Robert Whittaker (1969), que no feba cuaternazions d'os sers bibos més altas que es reinos, d'es cualos orichinalment n'eba zinco: Plantas, Animals, Fongos, Protistas y Moneras, pero que dimpués se'n re-cuaternoron os Moneras en Eubacterias y Archaeobacterias.
Autualment, ro Sistema d'es Tres Dominios de Carl Woese redefine ras agrupazions mayors d'os sers bibos como se-bi beye en ra figura, y define que només es Eukarya tienen reinos (Plantae, Animalia, Fungui y Protista) á mientres que ro taxón inmediatament inferior d'o dominio aintre de Archaea y Eubacteria ye ro filo.
[Editar] Diferenz cuaternazions istoricas
| Haeckel (1894) Tres reinos |
Whittaker (1969) Zinco reinos |
Woese (1977) Seis reinos |
Woese (1990) Tres dominios |
Cavalier-Smith (1998) Dos imperios y seis reinos |
||
|---|---|---|---|---|---|---|
| Animal | Animal | Animal | Eucariota | Eucariota | Animal | |
| Planta | Fongo | Fongo | Fongo | |||
| Planta | Planta | Planta | ||||
| Protista | Protista | Cromista | ||||
| Protozou | Protozou | |||||
| Monera | Arqueobacteria | Procariota | Arqueobacteria | Procariota | Bacteria | |
| Eubacteria | Eubacteria | |||||
