Monesterio de San Chuan d'a Peña
De Biquipedia
O Monesterio de San Chuan d'a Peña ye situato á lo surueste de Chaca, n'a probinzia de Uesca, estió lo monesterio más importán d'Aragón en l'alta Edá Meya.
Dixe a falordia, que un choben noble de nombre Boto, yera de cazata por istos paraches cuan beyó un pardo. O cazataire corrió dezaga d'a suya presa, pero ista fuyiba y cuan plegó á lo mon Pano, Boto s'espeñó por o xerbicadero. Miraglosamén perbibió á la caíta. Dende o fundo d'o barranco, beyó una chicota espelunga en a cuala trobó una armita adedicata á San Chuan Baltista y, en o interior, trobó lo calabre d'un armitaño clamado Chuan d'Atarés. Alticamato por o trobo, fue ta Zaragoza, bendió todas as suyas posesions y chunto á lo suyo chirmán Felix fuoron á bibir á ixa espelunga.
S'abitan estas montañas poco dimpués d'a embasión musulmana, cuan se construyió lo castiello de Pano, destruyito en l'añada 734.
Reinando en Pamplona Garzía Íñiguez y Galindo Aznárez I, conde d'Aragón prenzipian á faborexer á lo Monesterio. O rei Garzía Sánchez I atorgó á los monchos dreito de churisdizión, y os suyos suzesors dica Sancho lo Mayor, continuoron ista politica de proteuzión. Astí pasó os suyos primers años San Íñigo. En o reinato de Sancho Remíriz d'Aragón alquiere o suyo mayor protagonismo plegando á estar o pantión d'os reis d'Aragón.
Abió dos inzendios importans en 1494 y 1675. Debito á iste zaguer se construyió lo Monesterio Nuebo.
O Monesterio biello ye Molimento Nazional dende o 13 de chulio de 1889 y o monesterio nuebo ye Molimento Nazional dende 1923.
[Editar] O santo Grial
Seguntes a falordia española sobre o Santo Grial iste permanixió en o monesterio, dimpués de pasar por dibersos puestos como a espelunga de Yesa, San Pietro de Siresa, San Adrián de Sasabe, San Pietro d'a Sede Reyal de Bailo y a Catedral de Chaca, dende 1071 dica o 1399. A nezesidá d'atrayer á los peregrins que iban á Santiago y que pasaban por o amanau camín de Chaca á lo monesterio fazió que se lebara la reliquia astí. En 1399 o rei Martín I se lebó lo baso sagrau á lo palazio de l'Aljafería de Zaragoza, an estió más de bente añadas, dimpués d'una breu estada en Barzelona, acompañando á lo rey, se tresladó á la Catedral de Balenzia.
