Mī-làng Kŭng-dáik-lá
Lài-nguòng: Wikipedia
Mī-làng Kŭng-dáik-lá (Milan Kundera) 1929 nièng 4 nguŏk 1 hô̤ diŏh Ciĕk-káik (Czech) chók-sié, hiêng-câi dêu Huák-guók, guók-cié-ciō-ngiê-ciā, Sĕng-miâng Dṳ̆ng Dŏng-mâ̤-dái cĭ Kĭng (Ciĕk-káik-ngṳ̄: Nesnesitelná lehkost bytí; Huák-ngṳ̄: L'insoutenable légèrté de l'être; Ĭng-ngṳ̄: The Unbearable Lightness of Being; Dáik-ngṳ̄: Die Unerträgliche Leichtighkeit des Seins; Guók-ngṳ̄: 生命中不能承受之輕) gì cáuk-ciā.
[Siŭ-gāi] Sê̤ṳ-cék
1968 nièng, Kŭng-dáik-lá chăng-gă lāu "Buó-lá-gáh cĭ chŭng" (Prague Spring) gāi-gáik ông-dông, dáng-sê ciā ông-dông sák-sák-muōi ké̤ṳk Sŭ-lièng gŭng-dôi déng-ák. Iù-sê Kŭng-dáik-lá kăi-sṳ̄ sāi cṳ̆ piĕ-bìng Siâ-huôi-ciō-ngiê, gó-chṳ̄ ĭ gì cáik-pīng dŭ ké̤ṳk céng-hū céng-cī. 1975 nièng, Kŭng-dáik-lá buăng kó̤ Huák-guók kó̤ dêu.
Iè-mìng Huák-guók ī-hâiu, Kŭng-dáik-lá gié-sṳ̆k huák-biēu cáuk-pīng, gé-liŏh Ciĕk-káik-nè̤ng huāng-káung Sŭ-lièng lī-dê gì dâi-gié. 1984 nièng, ĭ siŏh-sié-nè̤ng īng-hiōng-lĭk dék duâi gì cṳ̆ «Sĕng-miâng Dṳ̆ng Dŏng-mâ̤-dái cĭ Kĭng» chók-bēng. Kŭng-dáik-lá hâiu-gĭ gì cáuk-pīng céng-dê ê-dô̤ muōng lài muōng ciāng, kăi-sṳ̄ gă-tiĕng diék-hŏk gì sṳ̆-kō̤.
[Siŭ-gāi] «Sĕng-miâng Dṳ̆ng Dŏng-mâ̤-dái cĭ Kĭng» gái-siêu
«Sĕng-miâng Dṳ̆ng Dŏng-mâ̤-dái cĭ Kĭng» sê Mī-làng Kŭng-dáik-lá dék chók-miàng gì siēu-siók, ĭng-ôi cī buô cṳ̆ Kŭng-dáik-lá ciáh sìng-ùi sié-gái có̤i ūi-dâi gì cáuk-gă cĭ ék.
Cī buô cṳ̆ tŭng-guó dó̤i céng-dê gâe̤ng diék-hŏk gì sṳ̆-kō̤, gōng-sŭk lāu còng-câi īng-hèng gì ciō-dà̤: còng-câi dó̤-dā̤ sê dâe̤ng gó sê kĭng? Céng-dê ô mò̤ niông ìng-séng biéng ngài? Cī gūi ciáh ông-dà̤ dĭk-dáik ìng-lôi īng-uōng sṳ̆-liòng cék-céng.
