Voceru per Caninu
From Wikipedia
U Voceru per Caninu hè un voceru di Corsica. Hè uriginariu di u Fiumorbu. Una surella piegne u so fratellu, banditu, chì hè statu tombu da setti omini, dopu à esse statu dinunciatu.
[edit] U voceru
- Eu vurria ch'è la me voci
- Fusse tamant'é lu tonu
- Chì pudessi trapassà
- La foce di Vizzavona
- Per fà ni à tutti palesi
- Le gran' prove di Gaddonu.
- Tutti à lu Lugu di Nazza
- Tutti s'eranu aduniti
- Cun quella barbara razza
- Li sullati è li banditi
- È la mani di bon'ora
- Sonu subitu partiti.
- Sonu subitu partiti
- À lu son' di cialambeddi ;
- Si sò tutti raduniti
- Li lupi sopra l'agneddi :
- Quandu ghjunsenu à la serra
- Ti taglionu li garganeddi.
- Quandu n'intesi la nova
- M'affaccai à lu purteddu
- È dissi : chì nova ci hè ?
- Hè mortu lu te frateddu :
- L'anu tombu ind'è la serra ;
- N'hanu fattu lu maceddu.
- Nun ti valse l'archibusgiu
- Nun ti valse la schiuppetta
- Nun ti valse lu pugnali
- Nun ti valse la terzetta ;
- Nun fi valse ingermatura
- Nè razione binadetta.
- À guardà le to ferite
- Mi s'accresci lu dulori.
- Perchè più nun mi rispondi ?
- Forse ti manca lu cori ?
- Cani cor di la suredda
- Tù cambiatu hai di culori.
- Lu me largu di spaddera !
- Lu me minutu di vita !
- Cume tè ni nun ci n'era
- Parii una mazza flurita.
- Cani cor di la suredda
- T'hanu privatu di vita.
- À lu paese di Nazza
- Eiu ci vogliu piantà un prunu
- Perchè di la nostra razza
- Ùn ci passi più nisunu :
- Perchè ùn funu trè nè quattru
- Ma setti omini contr'unu.
- À lu ped' di stu puddonu
- Ci vogliu piantà lu me lettu
- Parchi quì u me frateddonu
- Ti tironu à mezu pettu.
- Vogliu lacà lu bunetru
- Vogliu armà schioppu è stilettu
- Vogliu cinghje la carchera
- Vogliu cinghje la tarzetta.
- Cani cor' di la suredda
- Vogliu fà la tò vindetta.
