Тури Туçа вăтам шкулĕ
Wikipediaри материал
Тури Туçа вăтам шкулĕ, — Чăваш Енĕн Патăрьел районĕнчи Тури Туçа ялĕнче вырнаçнă вăтам шкул. Малтан çавăн пекех Тури Туçа хутăш училищи, Пуçламăш халăх училищи ятсемпе паллă пулнă.
Шкулăн спортзал, пуху залĕ, столовăй пур. Шкул çумĕнче стадион, спорт площадки пур. Шкулта халĕ кашни çул 230-250 ача вĕренет. Классенче 13-30 ача вĕренет. Пурĕ 12 класс. Ачасене 25 вĕрентекен вĕрентет.
Шкулăн çавăн пекех акса ӳстермешкĕн «Тойси» СХПКан 5 гектар çĕр пур. Шкулăн Интернета тухма пултаракан 12 компьютер, çавăн пекех видеокамера, тĕрлĕ аудио-, видеоаппаратура, шкул автобусĕ пур.
[тӳрлет] Истори
1840 çулта уделлĕ ведомство уçнă. Ку шкулта 1863 çултанпа И. Я. Яковлевпа пĕрле вĕреннĕ, Шетмĕ ялĕнче çуралнă Андрианов Константин Андриянович ĕçленĕ. И.Н. Ульянов сĕннипе вăл «Тăрăшнишĕн» Кĕмел медале тивĕçнĕ пулнă.
Училищĕне И.Н. Ульянов пĕрремĕш хут 1872 çулхи çĕртме уйăхĕн 8-мĕшĕнче килсе кайнă. Иккĕмĕш хут вăл 1879 çулта пăхса кайнă. Пĕрремеш хут килнĕ вăхăтра училищĕне тытса тăмашкăн хресченсенчен 285 тенкĕ те 42 пус пуçтарнă пулнă. Земство 120 тенкĕ панă пулнă. Ку укçаран 61 тенкĕ саккун вĕрентекенне тӳленĕ, 240 тенкĕ — вĕрентекене, 36 тенкĕ — хуралçăна, 18 тенкĕ кĕнекесем илме уйăрнă пулнă. 22 тенкĕ вĕренӳ пособиĕсем çине пĕтернĕ, 20 тенкĕ — çурта юсама, страхлама 7 тенкĕ те 50 пус пĕтернĕ.
Вăл вăхăтра училищĕре арçын ачасемпе хĕрачасем пĕрле вереннĕ. Пурĕ 44 арçын ача, 19 хĕрача вĕреннĕ.
1918 çулта Совет влаçĕ çитсен икĕ комплектлă училище туса хунă. 1927 çулхи ака уйăхĕнче Елчĕк салинчен кунта çамрăк хресченсен шкулне куçарнă. Пурĕ 7 çул вĕрентме тытăннă. 1935 çулта вăтам шкул туса хунă.
Шкул çуртне (640 вырăн) 1971 çулта купаласа хăпартнă.
