Friûl
De Vichipedie, la enciclopedie libare dute in marilenghe.
Il Friûl e je une regjon storiche de Italie nord orientâl, che al dì di vuê e je comprendude inte regjon Friûl-Vignesie Julie. Inte epochis stadis, i soi confins a jerin plui grancj, ma cumò in gjenar al è delimitât de Alps Cjargnelis a nord-est, a est de Alps Juliis e de prins cuei dal Cjars, a ovest dal Tiliment e de Livence. Chest teritori al è dividût tra lis provinciis di Udin, Gurize e Pordenon, Vignesie e Belun (dome il comun di Sapade.
Indis |
[cambie] Storie
[cambie] Lis origjinis
La preistorie e jè leade plui o mancul a chê de alte Italie, invezit cirche tal 400 a.C. si à il prin acjadiment c'al segnarà la storie de nestre tiare: la vignude dai Celts o Gjai Cjargnei. Si trate di popui des monts che no l'è ben cert di dulà c'a fossin vignûts. De lôr organizazion politiche e civîl si sa pôc o nuje, ma nus àn lassât cualchi testemoneance: bronzins, cualchi monede cjatade in Plan da Vincule (Cjargne), l'ipogeo celtic di Cividât, i sufîs dai paîs in -acco e -icco e diviarsis peraulis come bâr (di barros) broili (di brogilus) grave (di grava) e altris. I Celts a ocuparin lis zonis montuosis dal Friûl, in mût particulâr la Cjargne, che di lôr e cjape il non (Plinio il Vieli clame il teritori abitât dai Gjai Cjargnei Carnorum Regio). Cuant c'al vignive il frêt unviêr, i Gjai Cjargnei a levin jù te pedemontane cun lis lôr bestiis. La prime date storiche de vignude dai Cjargnei e si à tal 186 a.C. cuant che cirche 50.000 di lôr fra omps, feminis e fruts, vignûts jù in planure a fondarin insomp un cuel une vile clamade Akilejia
[cambie] I romans
Nel 181 a.C. i romans, c'a si devin pinsîrs pe grande espansion di chest popul, cuntun grant esercit a sdrumarin la vile, e a ributarin i cjargnei tra lis monts, fondant te Basse une lôr citât che clamarin par l'apont Aquilee. A Aquilee a cjaparin pît dutis lis ativitâts agriculis e artesanâls e la int dal lûc e jentrà a fâ part dal sisteme ministratîf roman. Al nassè il puart di Grau comunicant cun Aquilee e culì e forin mitûts la dogane, i magazens, la centrâl di smistament de produzion (soredut vin, vueli, pomis) pal forest e pal dulintor. Si faserin sù grandis stradis di comunicazion viars il centri Italie, il Noric e la Carniule. Lis tieris a forin dividudis cun la centuriazion e dadis in proprietât aes fameis dai soldâts di Rome. Simpri in chist period, a vegnirin fondâts e pò rinfuarçâts Julium Carnicum (ven a stâi Zui) e Forum Julii (ven a stâi Cividât) come basis militârs. In epoche imperiâl Aquilee e deventarà metropoli e capitâl de X regio Venetia et Histria.
[cambie] di Atile ai Langobarts
Tal 452, cuant che l'imperi roman al ere in plene crisi, al vignì de Panonie Atile che coi siei barbars al fiscà Aquilee ch'e piardè gran part da la sô impuartance. Dopo altris invasions di bande di plui popui, tal 489 al rivà Teodorì cul sô esercit di Ostrogots ch'a restarin in Friûl (e in Italie par cincuant'ains. Tal 568, passant par il Pâs dal Predil, a rivarin i Langobarts vuidâts di Alboino, ch'a faserin di Cividât cjâflûc dal Ducât dal Frûl; il patriarcje Paulin I al fuì a Grau puartant cun sè i tesaurs de glesie acuileiese. Dopo la conversion dai langobarts al cristianesim e la pâs cun Paulin I la sede dal partiarcjât e fo spuastade prime a Cormons e pò a Cividât; in chest period la citadine logade lunc il Nadison e deventà il plui grant centri dal Friûl, soplantant definitivamentri Aquilee. Grau parò e restà sot de influence dai Bizantins e dal pape di Rome. Vuè i langobarts a vegnin considerâts di tant di lôr i prins furlans, par il fat che il lôr teritori al comprendeve i cuatri municipis furlans e la la lôr linee di difese e jere plui o mancul chê segne i cunfins dal Friûl atuâl. Clamât dal pape di Rome, ch'al viodeve in chest popul une minace par il sô podê temporâl, tal 776 a rivarin in Italie i Francs di Carli, ch'a miterin la peraule fin ai doi secui di dominazion langobarde e si fermarin te nestre regjon par cint ains. Tra il 899 e il 952 i Ongjars cun lis lôr invasions a dispopolarin il Friûl, mentri plancaplan e scomençà a cjapâ pît la sovranitât religjiose e politiche dai patriarcjis.
[cambie] Dal Stât patriarcjâl ae Republiche di Vignesie
Ai 3 di Avrîl dal 1077 l'imperadôr Indrì IV al concedè in ministrazion feudatarie il Friûl al patriarcje di Aquilee Sigeart; e nassè la Patrie dal Friûl. Il Stât Patriarcjâl al fo governât prime di vescui ghibelins, todescs, e pò di vescui guelfs, talians e al durà par 343 ains fin al 1420 cuant che la Republiche di Vignesie e invadè il Friûl cussì di fasi un teritori cussinèt tra Vignesie e l'Imperi. A governâ il Friûl al ere la figure dal lûctenent venit, ch'al cjapà possès tal Cjastiel di Udin lassant al patriarcje dome il podê religjios e la rendite des vilis di Aquilee, Sant Denêl e Sant Vît.
