Jutori:Manuâl dal stîl
De Vichipedie, la enciclopedie libare dute in marilenghe.
Il manuâl di stîl al à come obietîf di mostrà chês che a son lis convenzions di adotâ cuant che si scrîf une vôs par fâ in mût che inte Vichipedie e sedi un pocje di uniformitât intai articui.
Chest manuâl nol è pensât tant che une leç inviolabil ma ben nome une racuelte di bogns conseis. Nol è che si scugnedi par fuarce là daûr dal manuâl. Chel che al conte di plui al è il contignût, no le scjate che lu ten dentri.
Dut câs se si rive a vê une cierte omogjeneitât tes vôs al è plui facil leilis e il dut al somee plui ben fat.
Indis |
[cambie] Conseis gjenerai
La Vichipedie e je une enciclopedie, ven a stâi che e je une font tierce di cognossince che e ripuarte des robis scritis in altris bandis. Si à di scrivi in mût impersonâl, imparziâl (PVN), cence fâ vignì fûr lis propris ideis.
Un bon consei al è che di da une cjalade a dai articui sul stes argoment par viodi cemût che a son organizâts.
[cambie] Cemût scomençà une vôs
Al è ben scomençà un articul cuntune curte introduzion, par esempli une definizion, che cjapedi dentri il non de vôs che, la prime volte che si scrîf, e va metude in neret. Par esempli:
- La economie e je une sience sociâl che e studie l'insiemit dai fenomens economics, ven a stâi la ativitât economiche des comunitâts umanis cu la produzion, la distribuzion e il consum di bens e di servizis.
altri esempi:
- Il zûc e je une ativitât ricreative fate da une o plui personis (i zuiadôrs), basade su:
- un obietîf che i zuiadôrs an di cirî di cjapâ (che pues ancje jessi diviers par ogni zuiadôr);
- un insiemi di regulis che determinin ce che i zuiadôrs puedin e non puedin fâ intant di zûc.
Se si scrîf une biografie al sarà ben meti il non, fra parentesis lûc e date de nassite e de muart. Cualchi esempli:
- Josef Marchet (Giuseppe Marchetti, Glemone ai 23 di Lui 1902 - Udin ai 8 di Mai 1966) al è stât plevan, insegnant, linguist, storiograf, storic e critic de art, leterât e un gjenerâl un dai plui impuartants pensadôrs furlans dal prin Nûfcent.
- Dino Zoff (Marian, ai 28 di Fevrâr 1942) zuiadôr e alenadôr di balon.
[cambie] Meti i titui
Cuant che la vôs a scomence a jessi un pôc plui lungje al sarà ben doprâ dai titui. In chest mût al vignarà fat in automatic l'indis dal articul. Un titul al ven fat doprant il segn di avuâl = par esempli:
==Paragraf 1==
===Paragraf 1.1===
====Paragraf 1.1.1====
=====Paragraf 1.1.1.1=====
==Paragraf 2==
===Paragraf 2.1===
[cambie] Finì la vôs
Ae fin dal articul si metaran, se a son, i leams aes altris vôs de Vichipedie o a sîts esternis. Par fâ chest al sarà ben meti doi titui:
== Vôs leadis ==
== Leams esternis ==
