Parlament de patrie
De Vichipedie, la enciclopedie libare dute in marilenghe.
Il parlament de Patrie dal Friûl al fo une istituzion parlamentâr furlane nassude sot dal Patriarcjât e durade fin al 1805.
Al parlament a vevin dirit di partecipâ i rapresentants dal clericât, de nobiltât e dai comuns.
Pal clericât a jerin i vescui e i superiôrs dai cjapitui, dai munistîrs e des preposituris. Pe nobiltât a vignivin sei i nobii di nomine imperiâl che chei nomenâts dal patriarcje. Par chel che al inten i comuns a jerin i rapresentants dai comuns di Aquilee, Cividât, Udin, Glemone, Sacîl e Tumieç.
Sot il stât patriarcjâl il parlament si riunive di solit a Cividât, in cualchi câs a Udin e a Sant Denêl.
Sot Vignesie la sede fisse e deventà Udin. Il salon dal parlament intal Cjistiel di Udin al fo fat dopo il taramot dal 1511.
Dopo dal 1420 sot la dominazion veneziane il parlament al fo ridimensionât te sôs competencis e nol podè plui decidi pe politiche foreste. La ultime riunion dal parlament a fo dal 1805.
