Zuan Batiste Tiepolo
De Vichipedie, la enciclopedie libare dute in marilenghe.
Zuan Batiste Tiepolo Vignesie, 15 di Març 1696 - Madrid , 27 di Març 1770 al è stât un pitôr venezian, cognossût a Udin, pai frescs tal Domo, tal Palaç Patriarcjâl, tal Cjistiel e te Glesie de Puritât. I sôi frescs udinês a son tes primis comissions de maturitât. Pâr chest motîf, Udin e je cognossude come la Citât dal Tiepolo.
Indis |
[cambie] I agns de zoventût
Zuan Batiste al nâs a Vignèsie, il 15 di Març dal 1696 da Meni (Domenico par talian) e Orsetta Marangon. La sô e je une famee indulà che nol mancje nuie, ma cuant che al veve nome un an, so pari al mûr, e pe famee e scomencin lis dificoltâts.
Al jentre zovin te buteghe dal pitôr Gregorio Lazzarini, indulà che al impare i rudiments dal mistîr di pitôr. Al ven influençât dai plui grancj pitôrs di Vignesie, soredut dal Piazzetta, dal Veronese e dal Tintoretto.
Al scomence i sôi prins lavôrs te glesie di Sante Marie dal Ospedaletto, intal 1715. Tal stes an al fâs ancje lavôrs pal dôs Giovanni Cornaro.
Intal 1716, al lavore tal fresc de glesie parochiâl di Biadene.
Intal 1717, al ven inscrit te associazion dai pitôrs di Vignesie, la Fraglia. Tal 1719, al si spose cun Marie Cecilie Guardi, sûr dâi pitôrs Francesc e Zuàn Antoni Guardi. La femine i darà dîs fîs, che lu judaran come assistents. Soredut Zuan Domeni e Laurinç e saran ricuardâts ancje come bogns pitôrs.
Jenfri il 1719 e il 1720, al lavore tai frescs dal prin plan de Vile Baglioni a Messenzago. Al ven judât da Gerolamo Mengozzi, che al fasarà pâr lui, lis decorazions dai sôi frescs.
Intal 1721, al lavore te Madone dal Cjarmin, che al si pues viodile te Pinacoteche di Brera. Dal 1722 al è il Martiri di San Bartolomiu pe glesie veneziane di San Stae, une vore biel.
Dal 1722 e je la Glorie di Sante Luzie, te glesie parochiâl di Vascon, dongje Trevîs Intal 1724, al finìs il Sacrifici di Isac, che al è l'ultin lavôr de sô zoventût.
Daspò di chest moment, Tiepolo al cambie mût, al lasse il so stîl, disin 'tenebrôs, par jentrâ tal stîl de maturitât. Al scomence a doprâ colôrs plui clârs, e a meti plui lûs tai sôi frescs
Jenfri il 1724 e il 1725, al lavore tâl Palaç Sandi, cjase dal avocat Tomâs Sandi, che lu clame par i frescs dal Salon.
Jenfri il 1725 e il 1726 al piture Alessandro e Campaspe tal studi di Apelle che si cjate cumò tal Museum of Fine Arts di Monreal, indulà che Apelle, il pitôr grêc, al a lis sôs sembiancis e Campaspe, chês de sô femine Cecilie.
[cambie] La Maturitât
Intal 1726, Tiepolo al rive a Udin, clamât da Dioniso Dolfin, Patriarcje di Olee. Tal Domo al lavore ai frescs de Capele dal Santissim Sacrament. Tal Palaç Patriarcjâl al fâs lis Senis dal Vecjo Testament, cun i Personaçs de Biblie i Agnui rivoltâts cuintri Diu che a colin dal cîl, la Aparizion dal Agnul a Sare, Rachele che plate i idui, il Sacrifici di Isac'.
Te Sale rosse al piture il Judizi di Salomon, par finî cu la Sale dal tron cun i ritrats dai Vecjos Patriarcjis.
Pai fradis dal Patriarcje, Danêl III e Danêl IV, al fâs, intal unvier, dîs cuadris cun storiis romanis, finîs tâl 1729. Vuê e son dispierdûts tâi museus di dût il mont.
Intal 1727 al nas Zuan Domeni, il so fi plui famôs, mentri tal 1730 lu clamin a Milan, indulà che al lavore tai Palaçs Archinto e Durgnani.
Al torne a Vignesie tal 1731, indulà che al lavore te glesie di Sante Marie de Fave ae Educazion de Vergjne e te 'Nativitât de Glesie di San Zulian.
Dal 1732 e je le Adorazion dal Frût te glesie veneziane di San Zeno.
Tal stes an al va a Berghem, indulà che al lavore tal Domo e te Capele Colleoni.
Tal 1734 al lavore tai frescs de Vile Loschi-Zilieri,dongje Vicence. Al finìs la Pale Rovetta e al cambie di cjase, lant te Pasine, dongje San Silvestri.
Dal 1735 a son la Madone dal Rosari e la Madone cul Frut e Sants
Tal 1736 al nas so fi Laurinç.
Tal zenâr dal 1737 al consegne il Martiri di Sante Aghite pe Basiliche di Sant Antoni a Padue. Al torne une altre volte a Milan, te Basiliche di Sant Ambrôs.
Al mande a Udin trê palis di altâr par il Patriarcje.
Al scomence lis voris pe glesie di Sante Marie dai Gjesuâs a Vignesie, che al finirà tal 1739.
Te sô piture al scomence a fâsi sintì la influence dal Tintoretto e dal Tizian ma ancje des incisions dal Rembrandt, soredut tai vecjos cu la barbe, rafigurâts te Senis de Passion di Jesus Crist, te glesie veneziane di Sant Alvise.
Simpri dal 1739 al è il Martiri di San Sebastian te glesie di Dessen.
[cambie] Palaç Clerici: lis voris par Francesco Algarotti
Intal 1740, al torne a Milan tal Palaç Clerici. Al lavore te galarie, intal grant fresc de Corse dal Cjar dal Soreli, cun grups di figuris di divinitâts.
Dal 1740 e je ancje le pale dal altâr Aparizion de Vergjin a San Filip Neri.
Al torne a Vignesie intal 1741: di chel an a son lis voris te glesie di Verolegnove, lis Senis de passion te glesie di Sant Alvise a Vignesie e la Apoteosi di Vittor Pisani, condotîr che al veve vinçût le bataie di Cjoze cuintri i gjenuês.
Intal 1743, al rive a Vignesie Francesco Algarotti, scritôr di origjin veneziane, che al veve di comprâ cuadris pal Re di Sassonie August III, e di puartâju a Dresde. Tiepolo al divente so amì, lu jude, cun altris pitôrs venezians, a cjatâ cuadris dai Mestris Pitôrs, e al fasarà ancje par lui il Banchet di Antoni e Cleopatre.
Dal 1743, a son lis telis de Scuele dal Carmin, cu la Aparizion de Madone al Beât Simon Stock.
Simpri dal stes an, e je la publicazion dai Capricci, une schirie di incisions.
Jenfri il 1743 e il 1744 a son lis voris te Vile Cordellina, cun il Trionfo de Virtût e de Nobiltât cuintri la ignorance.
Jenfri il 1744 e il 1745, a son lis voris tâl Palaç Barbarigo a Vignesie, in colaborazion cun il Mengozzi Colonna.
Jenfri il mês di Avrîl e il mês di Novembar, al lavore te glesie dai Discolçs (Scalzi), simpri a Vignesie, cun il Traspuart te Sante Cjase di Lorêt, lade pierdude inte prime vuere mondiâl. A restin nome i disens. Tal stes an, al consegne al Domo di Berghim le pale cul Martiri di San Zuan
[cambie] Palaç Labia e Würzburg
Jenfri il 1746 e il 1747 il Tiepolo al è a vore tal Palaç Labia a Vignesie, indulà che al piture tal Salon des Fiestis lis Storiis di Antoni e Cleopatre e Bellerofonte parsore Pegaso al va viers la Glorie e la Eternitât. Daspò al va te parochie di Sante Foscje, dongje il puint di Noâl.
Intal 1748 al è a vore tal Palaç Manin, simpri a Vignesie pe ocasion des gnocis di Ludovì Manin e Elisabete Grimani.
Dal stes an e je la pale des Santis domenicanis pe glesie dâi Gjesuâs.
Il 12 di dicembar dal 1750 il princip vescul Karl-Philipp von Greiffenklau, lu clame te citât di Würzburg, te Gjermanie, par dei lavôrs. Il Tiepolo al van cu i fîs. In tal Palaç dal Vescul,Tiepolo al lavore te Kaisersaal a lis pituris de Storis di Fidri Barberosse ,a lis Gnocis dal Barberosse ,Il vescul Aroldo al divente Duche de Franconie ,e tal scjalon grant a L'Olimpo dongje lis cuatris bandis dal mont. Al finis lis voris tal Palaç in tal mês di novembar dal 1753.
[cambie] Di gnûf Vignesie
Al lasse Würzburg il 8 di novembar dal 1753,par torna' a Vignesie. Il 8 di mai,al consegne ae glesie di San Polo le Aparizion de Vergjine a San Zuan Nepocumeno,e in tal 1754 al tache le decorazion de Glesie de Pietât ae Incoronazion de Vergjine. In tal 1757,al e a vore te Vile Valmarane,dongje Vicence. Al torne a Vignesie,par dei lavôrs te Ca Rezzonico. Al consegne une pale d'altâr ae glesie di San Silvestri a Folzone une par il Domo di Este Tal stês an al e' a vore tal Oratori de Puritât e in tal Palaç dal Arcivescul di Udin In tal 1760,al e' a vore a Verone ,tal Palaç Canosse,a Stra ,te Vile de famee Pisani,e al fâs une tele ,il Meracul di Sant Antoni pal Domo di Miran.
[cambie] Madrid
În tal 1761,il re Carl III di Spagne clame Tiepolo a Madrid par i lavôrs dal gnûf Palaç Reâl. Tiepolo al partîs il 31 di març,al rive il 4 di juign,simpri acompagnât dai fîs Laurinç e Zuan Domeni.Al vîf in te Plaza S.Martin. Al lavore a tre pituris,in te Sale dal Trono e in te anticjamare de Regjine. Ienfri il 1767 e il 1769,al piture siet palis di altâr par le glesie di Aranjuez. In tal 1769 al scomence lis decorazions a La Granja,ma no rive a fini' i lavôrs,di chest progjet restin nome i disens. Al mûr il 27 di març a Madrid
[cambie] Bibliografie
- T. Hetzer, Die Fresken Tiepolos in der Würzburger Residenz, Frankfurt, 1943.
- A. Morassi, Tiepolo e la Villa Valmarana, Milan, 1945.
- A. Morassi, Giovan Battista Tiepolo, Londre, 1955.
- A. Pallucchini, L’opera completa di Giambattista Tiepolo, Milan 1968.
- A. Porcella, La giovinezza di Gianbattista Tiepolo, Rome 1973.
- M. Gemin, F. Pedrocco, Giambattista Tiepolo. I dipinti. Opera completa, Vignesie 1993.
