Dreenk
Van Wikipedia
- Dit artikel is gesjreve in 't Valkebergs. Ómdat 't plaatsgebónje is, maogs doe 't ómzètte nao 't Voeres, as te dit dialek sjpriks.
Dreenk (Nederlands: Drink) ies 'n gehuch in de gemeinte Voere in Belsj. 't Bevingk ziech aan de helling dae vanoet Zjwaan in 't dal van de Voor nao bove geit. Aan dezelfde waeg liegke achterein de gehuchskes Brabant en Rule (Rullen).
In Dreenk bevingk ziech 'ne drinkpool. De beboewing liek rónd 'ne driesjprunk woavan ein carréboerderiej deens deit es kampplaats. Tegeneuver de pool bevingk ziech'n brón mèt zuver water. Dao sjteit nog 'ne pómpepaol woavan de zjwungel neet miè aanwezig ies. Daoveur in de plaats ies d'r 'n trepke nao óndere nao de sjtruimende waterbrón.
Aan de andere waeg vanoet de sjplietsing van Dreenk bevingk ziech 't gehuch Paerds.
